Qaraǵandyda KVI-de emdeýge arnalǵan gospıtalderdi qaıta qosylyp jatyr
QARAǴANDY. QazAqparat – Qaraǵandy oblysynda KVI emdeýge arnalǵan gospıtalderdi qaıta iske qosý bastaldy. Koronavırýs ınfektsııasymen aýyrǵandar sanynyń ósýine baılanysty óńirde naýqastardy emdeýge arnalǵan tósek oryndar birtindep ashyla bastady, dep habarlaıdy QazAqparat tilshisi.
Qaraǵandy oblystyq Densaýlyq saqtaý basqarmasynyń basshysy Gamal Toqsambaev ınfektsııalyq statsıonarlardaǵy tósek qorynyń kóbeıýi týraly málimdedi.
«Sońǵy aptrada bir KVI naýqastary sanynyń artýyn baıqap otyrmyz. Táýligine 95 adamǵa deıin tirkelýde. Epıdemııalogııalyq zertteýler kórsetkendeı, aýrýshańdyqtyń ósýine naýryz aıyndaǵy merekeler áser etken. Karantın sharalarynyń kúsheıtilýine qaramastan, adamdar bir-birlerimen kózdesip, ózara tikeleı baılanysqa túsýin doǵarmaǵan. Sondyqtan osyndaı ósim boldy. Qazir tósek-oryn qoryna júkteme artty. Biz koronavırýspen aýyratyndar úshin qosymsha oryn daıyndaý jóninde sheshim qabyldadyq. Bizde 2 myńnan astam tósek-oryn rezervte tur, olardy birtindep qaıta iske qosyp jatyrmyz», - dep atap ótti Gamal Toqsambaev.
Onyń aıtýynsha, jalpy alǵanda 700-ge jýyq tósek-oryn ashyldy. Kelesi aptaǵa deıin taǵy 400-in ashý josparlanyp otyr.
Dári-dármekpen qamtamasyz etýde problema joq. Aýrýhanalarda dári-dármektiń jetkilikti qory bar.
Emhanalar janyndaǵy mobıldi brıgadalar óz tıimdiligin kórsetti, dep atap ótti basqarma basshysy. Qaraǵandy boıynsha olardyń sany 300-den asady. Mobıldi brıgadalardyń jumysyn keshki saǵat onǵa deıin uzartý kózdelip otyr.
Ótken jyly mobıldi brıgadalar kólikpen qamtamasyz etildi. Barlyǵy 102 sanıtarlyq mashına satyp alyndy.
Sondaı-aq, medıtsınalyq ınfraqurylymdy nyǵaıtýǵa qomaqty qarajat jumsaldy. Búgingi kúni oblysta 26 kompıýter tomografy, KVI bar patsıentterge arnalǵan 364 ÓJJ apparaty bar. 40 sandyq rentgen-apparat, 2 800 ottegi kontsentratory jáne basqa da jabdyqtar satyp alyndy. 25 medıtsınalyq uıymda ottegin ortalyqtan berý júıesi júrgizildi.
«KVI-diń alǵashqy tolqynyndaǵy tájirıbe men qatelikterdi eskere otyryp, búkil densaýlyq saqtaý júıesiniń jumysy kúsheıtildi», - dep atap ótti Gamal Toqsambaev.
