Qaraǵandyda kúzetshige 6 keli altynnyń urlyǵy boıynsha aıyp taǵylyp otyr
QARAǴANDY. QazAqparat - Qaraǵandyda «Álem» saýda úıiniń 12 býtıginen 6 keli altyn tonaý áreketi kúzetshi men onyń dosyna qatysty sot protsesi bastalady, dep habarlaıdy «QazAqparat» HAA tilshisi.
Tergeý nusqasyna sáıkes, Jandos Asanov esimdi kúzetshi 2016 jyldyń 28 naýryzynda dabys belgisin qospaǵan jáne nysandy ortalyq kúzet qyzmetine ótkizbegen. Qaraǵandy ІІB ońtústik shyǵys ІІB-nyń tergeý nusqasy boıynsha óziniń tanysy Danııar Ábdiramanovpen 12 býtıkten zergerlik buıymdardy urlap ketken. Osydan keıin seıfter qoparylyp, saýda bólimderin jalǵa alyp jatqan kásipkerlerdiń aqshasy qoldy bolǵan.
Nysan onlaın-rejımde jumys atqaratyn, beınejazbasy fleshkaǵa jazylatyn beınabaqylaý kamerasynyń baryn biletin eki kúdikti medıtsınalyq betperde kıip alǵan. Urlyq iske asyrylǵannan keıin nysan ortalyq sıgnalızatsııaǵa qosylǵan.
29 naýryzda «Álem» saýda úıi ákimshiliginiń qyzmetkerleri jumysqa kelip, urlyqtyń bolǵanyn kórgennen keıin polıtsııaǵa habar bergen. Al kúzetshi Jandos Asanov jumys ornynan tabylmaǵan. Onyń atalǵan saýda úıine jumysqa ornalasqanyna bar-joǵy 1 aı ǵana bolypty. Oǵan izdeý jarııalanyp, Qaraǵandy qalasynyń barlyq lombardtaryna Asanov nemese onyń zaıyby, álde ápkesi altyn ótkizýge kelse birden habar berý kerektigi týraly eskertilgen.
Kúzetshiniń týysynyń qylmysqa qatysy bolýy múmkindiginen polıtsııa qyzmetkerleri kúdiktenbegen kórinedi. Arada tórt aı ótkennen keıin kúzetshi men ekinshi kúdikti qolǵa túsken. Ustalǵandardyń biriniń advokaty Lıdııa Arzamasova polıtsııa bólimine 6 keli altyn men 9 myń AQSh dollaryn ákelip, óz qorǵaýyndaǵy adamnyń aýlasyna bul qundy zattar men aqshany bireýlerdiń ákep tastaǵanyn aıtyp bergen.
Jábirlenýshi kásipkerler bul nusqaǵa senbeı, advokattyń olardy aqtap alýyna kúsh salyp jatyr dep málim etti. Jábirlenýshiler 6 keli altyndy kúdiktilerden tárkilengen zat retinde tirkeýdi surady. Aqyry, tergeýshi Arzamasovany qylmystyq iske qatysty kýáger retinde tanydy. Bir sot isinde kýáger ári advokat bolý zańǵa qaıshy. Osy sebepti, Arzamasova advokat retinde qatysýdan shettetildi.
6 keli altynnyń barlyǵy kásipkerlerge qaıtarylyp berildi. Keltirilgen shyǵyn 226 mıllıon teńgeni quraǵan.
«Eki kúdiktige qatysty qylmystyq is sotqa tústi. Gúlnar Degenova sýdıa bolyp taǵaıyndaldy», - dep habarlaıdy Qaraǵandy qalasy Qazybek bı aýdanynyń №1 sotynan.
Sottalýshylarǵa QR QK 188-baby 3 jáne 4-bóligi aıyp taǵylyp otyr.
