Qaraǵandyda kúıeýin óltirýge tapsyrys bergen áıel sottaldy
QARAǴANDY. QazAqparat - Qaraǵandyda óz kúıeýin óltirýge tapsyrys bergen «Báıterek» balabaqshasynyń tárbıeshisi 11 jyl 3 aıǵa sottaldy, dep habarlaıdy «QazAqparat» HAA tilshisi.
Tárbıeshiniń kúıeýin óltirmekshi bolǵan onyń naqsúıerine sot 16 jyl jazasyn óteý úkimin taǵaıyndady.
«Sot sottalýshyny QR QK-iniń 24-bap 3-99-bólimi jáne 28-bap 4-99 bóliminde kózdelgen «Aldyn ala kelisý boıynsha, olarǵa qatysty emes jaǵdaılarǵa baılanysty aıaǵyna deıin jetkizilmegen, tulǵalardyń toptasýymen adam ómirine qastandyq oılaý» boıynsha kináli dep tanyp, 11 jyl 3 aı bas bostandyǵynan aıyrý jazasy taǵaıyndady. Áıeldiń kishkentaı úsh balasynyń bolýy, istegen isine ókinetindigi men qylmysqa qatysty basqa kinálilerdi anyqtaý boıynsha tergeýdegi belsendiligi úshin jazasy jeńildetildi. Sot sottalýshyǵa qatysty aýyrlatatyn mán-jaılardy anyqtaǵan joq», - dedi Qaraǵandy oblysy qylmystyq ister jónindegi mamandandyrylǵan aýdanaralyq sotynyń sýdıasy Islamhan Esenbaev.
Krıstına Ábisheva kinásin tolyqtaı moıyndady.
Onyń kinásin moıyndamaı, barlyq jaýapkershilikti qurbysyna artqan naqsúıeri Nıkolaı Pıatkındi sot Qylmystyq kodekstiń atalǵan baptary boıynsha kináli dep tanydy.
«Sottalýshynyń áreketterinde jazasyn jeńildetetin mán-jaılar bolǵan joq. Ol buǵan deıin QR QK-iniń eski redaktsııasyndaǵy 96-babynda qarastyrylǵan «Adam óltirý» jáne QK-iniń 179-baby «qaraqshalyq shabýyl» boıynsha sottalyp, 14 jyl bas bostandyǵynan aırylǵan bolatyn», - dedi sýdıa Esenbaev úkimdi habarlaý kezinde.
Eske sala keteıik, buǵan deıin Qaraǵandy oblysy ishki ister departamenti uıymdasqan qylmyspen kúres basqarmasynyń qyzmetkerleri Qaraǵandydaǵy tapsyryspen kisi óltirýdiń aldyn alǵandyǵy týraly habarlaǵan bolatynbyz.
