Qaraǵandyda «Kúı-MІH» respýblıkalyq baıqaýy ótti

QARAǴANDY. QazAqparat - Qaraǵandyda «Rýhanı jańǵyrý» baǵdarlamasy aıasynda jyl saıyn uıymdastyrylatyn «Kúı-MIX» respýblıkalyq baıqaýy ótti. Baıqaý fınalısteri Qaraǵandy qalasynyń Dostyq úıinde gala-kontsertke jınaldy, dep habarlaıdy QazAqparat tilshisi.

Baıqaýǵa qatysý úshin mýzykanttar tıisti ótinim berip, irikteý kezeńinen ótti. Aqtyq saıysqa Nur-Sultan, Almaty, Qaraǵandy jáne Kókshetaý qalalarynan 8 qatysýshy jiberildi. Baıqaý 18-28 jas aralyǵyndaǵy jastar arasynda ótkizildi.

Uıymdastyrýshylardyń aıtýynsha, bıyl joba aýqymdy boldy. Baıqaý aıasynda № 102, №103 mektep-gımnazııalarda, Qaraǵandy qalasynyń joǵary polıtehnıkalyq kolledjinde jáne Qaraǵandy atyndaǵy E.A. Bóketov atyndaǵy QarMÝ-de qatysýshylardyń kórsetilim qoıylymdary ótti.

«Biz jyl saıynǵy «Kúı-MIX» respýblıkalyq baıqaýyn Jastar jylyna oraılastyrýdy sheshtik. Ony Qaraǵandy oblysynyń Jastar resýrstyq ortalyǵymen birlesip uıymdastyrdyq. Baıqaý halyq mýzykasyn tanymal etýge, óskeleń urpaqty salt-dástúrge, mádenıetke jáne halyq shyǵarmashylyǵyna tartýǵa baǵyttalǵan», - deıdi Qaraǵandy oblysynyń jastar saıasaty máseleleri jónindegi basqarmasynyń basshysy Nurjan Jetpisbaev.

Baıqaý qorytyndysy boıynsha bas júlde qaraǵandylyq «Tarlan» tobyna berildi. Birinshi oryndy Nur-Sultan qalasynan kelgen Temirlan Oljabaı jáne Ernat Naýryz dýeti ıelendi. Ekinshi oryndy Baqytjan Jelderbaev pen Maqsat Hasanov jeńip aldy. Úshinshi oryn Jańaarqa aýdanynyń mýzykanty Ýálıhan Shekımovke buıyrdy.

Jeńimpazdar men qatysýshylarǵa dıplomdar, aqshalaı sertıfıkattar jáne syılyqtar tabys etildi.

Jastar saıasaty jónindegi basqarmada atap ótkendeı, baıqaý «Rýhanı jańǵyrý» baǵdarlamasynyń ulttyq biregeılikti, mádenıetti jáne jeke ulttyq kodty saqtaý baǵytyndaǵy mindetterine tolyq sáıkes keledi. Osy sebepti ol Qaraǵandy oblysynyń jobalar tizilimine engizildi.

Sonymen qatar, Gala-kontsertpen birge dombyrada oınaý úshin avtomattandyrylǵan robototehnıkalyq júıeniń tusaýkeseri uıymdastyryldy. Ony «Nazarbaev Zııatkerlik mektebiniń» oqýshylary jasap shyǵardy. Robot ázirge tek «Erkemaı» shyǵarmasyn ǵana oryndaı alady. Alaıda bolashaqta ónertapqyshtar ony basqa da kompozıtsııalarǵa úıretýdi josparlap otyr.

Buǵan qosa kórermender shara barysynda saksofonda oryndalǵan kúılerdi tyńdady, ony mýzykant Irına Borzyh oryndady. Táttimbet atyndaǵy kolledj stýdentteri kúı fleshmobyn ázriledi. Sondaı-aq sahnada Balalar óner mektebiniń dombyra synyby boıynsha oqýshylar óner kórsetti. Kesh qonaqtary men qatysýshylarǵa Qaraǵandy oblysynyń daryndy jas mýzykant Maǵjan Faızrahman dombyrada oınaý sheberligin kórsetti.