Qaraǵandyda qutqarylǵan bóltirikterge «Taqtalas» fılmindegi bórilerdiń attary berildi
Oqıǵa 24 sáýirde boldy. Janýarlar álemin qorǵaýshylar bireýlerdiń qasqyrdyń apanynan jańa týǵan bóltirikterdi alyp ketkenin anyqtaǵan. Keıin quqyq buzýshylar ózderi áleýmettik jelilerdegi paraqshalaryna qasqyrdyń kúshikterin apannan alyp shyǵyp jatqany túsirilgen beınejazba salǵan. Olar bóltirikterdi satpaqshy bolǵan.
Brakonerlerge QR ÁQBtK-niń 389-baby boıynsha ákimshilik is qozǵaldy. Quqyq buzýshylarǵa 30 AEK (75 750 teńge) kóleminde aıyppul salynady.
Qazir «Saryarqa» Agroónerkásiptik holdınginiń qoryqshysy Temirhan Bazylov bóltirikterdi qamqorlyǵyna alǵan. Dál osy kisi qasqyrdyń kúshikterine erekshe ataý bergisi kelgen.
«Temirhan Bazylov «Taqtalas» telehıkaıasyn kóredi. Brakonerlerden qasqyrdyń kúshikterin tárkileý kezinde bizdiń qyzmetkerlermen birge Temirhan da boldy. Sol kezde ol bir serııada basty keıipkerlerdiń biriniń balalary bóriniń kúshikterin taýyp alatyn bir epızod bar ekenin eske túsiredi. Sol kezde muny bir sáıkestik dep sheshken», - dedi Qaraǵandy oblystyq orman sharýashylyǵy jáne janýarlar áleminiń aýmaqtyq ınspektsııasy basshysynyń orynbasary Abaı Áljanov.
Teleepopeıada barlyq kókjal bórilerdiń taǵdyry qaıǵyly boldy. Soǵan qaramastan, qutqarýshylar jańa týǵan kúshikterge eshqandaı qaýip tónbeıtinine senimdi. Qazir bóltirikterge bir apta boldy. Olar tolyǵymen saý, sút ishedi jáne jaqyn arada kózderin ashýy tıis.
Kúshikter ósip, aıaqtanǵan kezde mamandar olardy ne erkine jiberedi, ne agroónerkásiptik holdıngte qaldyrady. Ol janýarlardyń densaýlyǵyna baılanysty bolmaq.
Qazir Qaraǵandy oblysynda qasqyrlar sany 400-ge jetti. Olardy aılaýǵa tyıym salynǵan. Bul jyrtqyshtardy tek malǵa nemese adamdarǵa shabýyl jasaǵan jaǵdaıda ǵana atýǵa ruqsat etiledi.