Qaraǵandyda qutqarýshylar jalyn sharpyǵan úıden kishkentaı balany alyp shyqty
QARAǴANDY. QazAqparat - 9 aqpan kúni Qaraǵandy qalasynda jeke turǵyn úıdiń shatyry órtendi, dep habarlaıdy QazAqparat tilshisi.
9 aqpanda 06:51-de órt sóndirýshilerdiń kezekshi pýltine Qaraǵandy qalasy, Klıýchevaıa kóshesindegi jeke turǵyn úı shatyrynyń janyp jatqany týraly qońyraý tústi. Órt sóndirýshiler shaqyrtý ornyna tez arada jetti. Tilsiz jaý jer úıdiń shatyr aǵash toryn, tóbe qaptamasyn, úı zattaryn, tereze jáne esik jaqtaýlaryn, jıhaz ben aǵash edendi, sonymen qatar, garajdyń aǵash konstrýktsııalary men úı mańyndaǵy qurylystardy sharpyǵan. 
Janǵan úıden órt sóndirý brıgadasy bir balany evakýatsııalady.
«Órt sóndirý - qolaıly aýa raıynyń ózinde asa aýyr mindet, degenmen mynadaı qatty aıaz kezinde, ekstremaldy jaǵdaılarda bul naǵyz synaq. -36 gradýsqa jetken qatty aıaz, tútik qubyrdaǵy qatyp qalǵan sýǵa, barlyq kedergilerge qaramastan, órt sóndirýshiler ózderiniń kásipqoılyǵyn kórsetti», - dep málimdedi Qaraǵandy oblystyq TJD baspsóz qyzmeti.
Saǵat 08:52-de tilsiz jaý aýyzdyqtaldy. Oqıǵa ornyna Qaraǵandy oblystyq TJD Órt sóndirý jáne avarııalyq-qutqarý jumystary qyzmetiniń 53 qyzmetkeri men 11 tehnıkasy jumyldyryldy. Qazirgi tańda órttiń shyǵý sebebi anyqtalyp jatyr.
