Qaraǵandyda qus salýdan respýblıkalyq týrnırge qatysatyn búrkitshiler irikteldi
QARAǴANDY. QazAqparat - Qaraǵandyda aýshy qustarmen ań aýlaý boıynsha respýblıkalyq týrnırdiń qatysýshylary tańdaldy. Atalmysh doda osy aptanyń sońynda Semeı qalasynda ótedi jáne Abaıdyń 175 jyldyq mereıtoıyna oraılastyrylǵan, dep habarlaıdy QazAqparat tilshisi.
Respýblıkalyq týrnırge qatysý úshin búrkitshiler Qaraǵandy oblysynyń chempıonatynda óz sheberligin dáleldeýi tıis. Báseke «Karat» at zaýyty aýmaǵynda ótti. Qatysýshylar aýshy qustarmen ań aýlaý sheberligin kórsetti, olar jarysqa óz búrkitin, suńqary men qarshyǵasyn ala keldi.
Suńqarlar men qarshyǵalar túlki tulybyn ustaýdan jaryssa, búrkitter tiri qoıan aýlady.
Búrkitshiler arasynda birinshi oryndy Aqjelken atty búrkittiń ıesi, qaraǵandylyq chempıon Temiráli Tólegenuly jeńip aldy. Ekinshi oryndy búrkitshiler otbasynyń úshinshi urpaǵy Asan Ábdirazaqov pen Shet aýdanynan kelgen Saryarqa qusy ıelendi. Úshinshi oryn Buqar Jyraý aýdanynyń ókili Jaras Dosov jáne onyń Aqbet atty qusyna berildi. Qarshyǵamen ań aýlaýda Erǵazy Erasyl jáne onyń Sóget atty qarshyǵasy úzdik boldy. Ekinshi oryndy Tańat Ospanqulov pen Jebe atty qarshyǵa ıelendi. Úshinshi oryn Nurdáýlet Egintaı men onyń Bıdaıyq atty qusyna buıyrdy.
Tóreshilerdiń sheshimimen Semeı qalasynda ótetin respýblıkalyq týrnırge Temiráli Tólegenuly, Asan Ábdirazaqov jáne aýshy qustarmen ań aýlaý boıynsha oblystyń aǵa jattyqtyrýshysy Tólegen Mahambetshın attanady. El birinshiliginde qarshyǵamen ań aýlaýda Erǵazy Erasyl óz sheberligin kórsetedi.
Ekinshi aqpanda «Qaırat» ulttyq jáne at sporty túrleri BJSM at-sport bazasynyń aýmaǵynda tazy tuqymdy ıtterdi tirkeý jáne tólqujattardy saltanatty túrde tapsyrý rásimi ótti. Sharadan keıin ıtter júgirip jarysty. «Arlan» nomınatsııasy boıynsha Abaı aýdanynan kelgen Maılaq degen tazy men onyń ıesi Amantaı Tólegen jeńimpaz atandy. Ekinshi orynda - Anna Zaharova men qaraǵandylyq Djek esimdi ıt. Úshinshi oryndy Buqar Jyraý aýdanynyń ókilderi ıelendi.
«Urǵashy» nomınatsııasy boıynsha Shet aýdany men Qaraǵandy qalasynyń qatysýshylary úzdik atandy.
Kúshikter arasynda Nura aýdany, Temirtaý, Aqtoǵaı aýdanynan kelgen qatysýshylar jeńimpaz atandy.
Chempıonatqa 100-den astam tazy tuqymdy ıt qatysty. Jarysty «Qaırat» ulttyq jáne at sporty túrleriniń BJSM basshysy, Qaraǵandy oblysynyń ulttyq jáne at sporty túrleri federatsııasynyń prezıdenti Shárızat Qaztaev uıymdastyrdy.
