Qaraǵandyda qurylys basqarmasynyń burynǵy basshysy 10 jylǵa qamalýy múmkin
QARAǴANDY. QazAqparat - Qaraǵandy oblysy qurylys basqarmasynyń sheneýnikteri Saran qalasyndaǵy ortalyq jylý qazandyǵy qurylysynyń atqarylǵan jumys aktilerin ádeıi qymbat baǵamen toltyryp, memleketke 50 mıllıon teńge zalal keltirgen, dep habarlaıdy QazAqparat tilshisi.
Sot otyrysynda prokýror Qaraǵandy oblysy qurylys basqarmasynyń burynǵy basshysy Temirǵalı Dúısenbaevty 10 jylǵa, onyń qol astyndaǵy qyzmetkeri - basqarma bóliminiń burynǵy basshysyn 8 jylǵa bas bostandyǵynan aıyrýdy surady. Sondaı-aq, prokýror óz jumysyn atqarmaǵan merdigerge de 10 jyl, tehnıkalyq qadaǵalaýmen aınalysqan jeke kompanııa ókilderine - 8 jyldan berýdi surap otyr.
Barlyq bes sottalýshyǵa QR Qylmystyq Kodeksiniń 176-baby - «Senip tapsyrylǵan bóten múlikti ıelenip alý nemese ysyrap etý» boıynsha aıyp taǵyldy. Qaraǵandy oblysy qurylys basqarmasynyń burynǵy basshysy Temirǵalı Dúısenbaev qosymsha QK 314-baby, 2-bóligi «Qyzmettik jalǵandyq jasaý» babymen de aıyptalyp otyr.
Qaraǵandy oblysynyń ákimdigi barlyq bes sottalýshyǵa 49 mıllıon 828 myń 238 teńgege talap aryz jazdy.
Qazandyq qurylysy óńir úshin óte mańyzdy bolatyn. Qazandyq arqyly 43 000 myń adam turatyn qalany sapaly ortalyq jylýmen jáne ystyq sýmen qamtamasyz etedi dep kútilgen. Joba merdigeri «Pavlodar qazandyq zaýyty» JShS Qaraǵandy oblysynyń qurylys basqarmasymen 2015 jyldyń jeltoqsanynda kelisimshart bekitken. Alaıda, merdiger qarjylyq qıyndyqtary alǵa tartyp, barlyq jumysty toqtatyp qoıǵan.
Eske sala ketsek, Qaraǵandy oblysy qurylys basqarmasynyń burynǵy basshysy Temirǵalı Dúısenbaev «Pavlodar qazandyq zaýyty» JShS atqarǵan jumystar jóninde jalǵan derekter keltirdi dep aıyptalýda. Atalǵan fırma nysandy der kezinde paıdalanýǵa bermegen. Biraq, sheneýniktiń jalǵan derek kórsetýinen bıýdjettik aqshanyń aýqymdy bóligi fırmaǵa zańsyz aýdarylǵan. Qazandyq áli kúnge deıin qoldanýǵa berilmedi.
