Qaraǵandyda quny ₸51 mlrd bolatyn 18 kásiporyn Jekeshelendirýdiń keshendi josparynan shyǵaryldy

QARAǴANDY. QazAqparat - Qaraǵandy oblysynyń prokýrory Baýyrjan Myrzakerovtiń tóraǵalyǵymen 2023 jyldyń birinshi jartyjyldyǵyndaǵy jumys qorytyndysy boıynsha oblys prokýratýrasynyń keńeıtilgen alqa otyrysy ótti, dep habarlaıdy QazAqparat.

Prokýrorlar 3 myńnan astam kásipkerlik sýbektiniń quqyǵyn qorǵap, olarǵa 97 mln teńgeden astam qarjyny qaıtardy.

119 qadaǵalaý aktisin engizip, 33 laýazymdy tulǵa jaýapqa tartylǵan.

Eki kásipkerge elden shyǵýyna qoıylǵan negizsiz shekteýler jáne alty kásipkerdiń múlkine zańsyz salynǵan tyıym alynyp tastaldy.

10 kásipkerdiń quqyǵy qorǵalyp, zańsyz qozǵalǵan qylmystyq ister toqtatyldy.

Nátıjesinde kásipkerlerden túsetin shaǵymdar 40 paıyzǵa (205-ten 126-ǵa deıin) tómendedi.

Aktıvterdi qaıtarý boıynsha jalpy quny 51 mlrd teńgeni quraıtyn 18 kásiporyn Jekeshelendirýdiń keshendi josparynan shyǵaryldy.

Zańsyz berilgen 37 jer ýchaskesi memleketke qaıtaryldy.

Salyq esebinde 2,9 mlrd teńgege kapıtal shyǵarǵanyn kórsetpegen 20 kásiporyn anyqtaldy.

Jalpy, ótken jylmen salystyrǵanda qadaǵalaýdyń barlyq baǵyttary boıynsha oń kórsetkishter baıqalady.

Qylmys 20 paıyzǵa azaıdy.

Bir de bir aqtaý úkimi shyǵarylǵan joq.

Azamattardyń konstıtýtsııalyq quqyǵyn buzý 5 ese azaıdy.

Qadaǵalaý aktileri boıynsha 911 mln teńge óndirildi, onyń ishinde 640 mln - memleket kirisine, jalpy somasy 1,3 mlrd teńge quraıtyn múlik qaıtaryldy.

130 mln teńge ákimshilik aıyppul óndirip alyndy.

5 mlrd teńgege zańsyz memlekettik satyp alý toqtatyldy.

Den qoıý sharalarymen 90 myńnan astam azamattyń quqyǵy qorǵaldy.