Qaraǵandyda «Kúngeı» turǵyndary úshin mektep salyna bastady
Mekteptiń salynýyn jergilikti turǵyndar kópten beri surap keledi. Sebebi oqýshylar qatynap oqyp kelgen.
Qaraǵandy oblysynyń ákimi Ermaǵanbet Bólekpaev ózekti máseleleri qordalanǵan «Kúngeı» turǵyndarymen kezdesti. Bastamashyl top ókilderi birinshi kezekte sheshilýi tıis túıitkilderdi atady.
«Kúngeı» shaǵynaýdanynda joldardy jóndeý jalǵasady, jumystar jasalatyn ýchaskeler turǵyndarmen kelisim boıynsha tańdalady. Kólik máselesi de sheshilýde. Turǵyndardyń ótinishimen 16-marshrýtqa úshinshi avtobýs qosyldy, qozǵalys shemasy ózgerdi. Ermaǵanbet Bólekpaev qala ákimine jaqyn arada «Kúngeıdiń» shalǵaı aýdandaryn qamtý úshin ekinshi baǵyt ashýdy tapsyrdy.
Kóshelerdi jaryqtandyrý da ózekti másele. Jumystar bıyl bastalady.
«Men «Kúngeıde» on jyldaı turamyn. Mekteptiń salyna bastaǵanyna óte qýanyshtymyz. Bul kópten bergi ótinishimiz. Bizdiń shaǵynaýdanǵa nazar aýdardy, turǵyndardyń ótinishterine qulaq túrildi. Biraq áli de kóptegen problemalar bar: joldardan bastap qańǵybas ıtterge deıin. Men kóshelerde jaryq ornatýyn suraımyn. Bılik buǵan kómektesedi dep senemiz», – deıdi Nazgúl Terlikbaeva.
Bolashaqta turǵyndardyń ótinishi boıynsha dene shynyqtyrý-saýyqtyrý keshenin salý josparlanýda.
«Bıliktiń ótinishimizge qulaq asqanyn kórip otyrmyz. Kótergen máselelerimiz sheshile bastady. Shaǵynaýdanda qalypty joldar bolǵan joq, qazir asfalt tóseldi. Elektr jelisi tartyldy. Mektep qurylysynyń bastalýy – biz úshin úlken qýanysh. Bizdiń shaǵynaýdanda 15 myńǵa jýyq adam turady, balalar óte kóp», – dedi bastamashyl toptyń ókili Ulan Jumabekov.
