Qaraǵandyda kún tártibinde - ózekti máseleler

Jer reformasyn talqylaýǵa qatysty respýblıkalyq komıs­sııaǵa oblys atynan kirgen «Qazaqstan sharýalar odaǵy» qoǵamdyq birlestigi oblystyq fılıalynyń tóraǵasy Abdolla Tórebekov búngi tańdaǵy ózgeristerge toqtaldy.

- Zańnyń 24-babynyń bir­inshi tarmaǵy ózgerissiz qaldy. Qarapaıym halyqtyń jerdi basybaıly satyp alýǵa múmkindikteri joq. Sondyqtan, jalǵa berý máselesi qaralyp jatyr. Jalǵa beriletin jer kólemi jeke adam úshin de, zańdy tulǵa úshin de res­pýblıka boıynsha birdeı bolýy tıis. Bul másele ekonomıkıka turǵysynan zerdelenýde. Sonymen qatar, jerdi jalǵa berý normasyna, ıaǵnı, 50-bapqa ózgerister engiziletin bolady. Búgingi tańda satylymǵa shyǵarylǵan jerdiń 1,3 paıyzy satyldy,- dedi ol.

A.Tórebekovtiń aıtýynsha, osy ýaqytqa deıin respýblıkalyq komıssııa otyrysy ótken Almaty, Aqmola jáne Qyzylorda oblystary jerdi satýǵa qarsylyq bildirýde. Memleket negizi jer men halyq ekenin tilge tıek etken sarapshy kópshiliktiń osy pikirine qulaq asqan jón dep sanaıdy.

Budan keıin sóz alǵan oblystyń jer qatynastary basqarmasynyń basshysy Aıan Shalmaǵambetov oblys turǵyndarymen kezdesýler ótkizilip, túsindirý jumystarynyń júrgizilip jatqanyna toqtaldy.

- Jer máselesine qatysty qurylǵan call-center-ge bir aıdyń ishinde 113 qońyraý shalyndy. Sonymen qatar, turǵyndardyń sa­ýaldaryna jaýap berip, túsindiretin ortalyqtar ár aımaqta ashylǵan,- dedi ol.

Basshy kópshiliktiń kóńilindegi máselelerdi ortaǵa saldy. Máse­len, mal jaıylymynyń jetispeýshiligi. Qajet barlyǵy 6 mln. ga jaıylymnyń búginde 42,7 paıyzy ǵana qamtylǵan. Jerge qazaqstandyqtardyń jeke­menshik quqyǵynyń saqtalýy. Jerdi sheteldikterge satýǵa tıym salý. Sheteldikterge jalǵa beriletin 25 jyldy 10 jylǵa qysqartý máseleleri óńirlerde ótken halyqpen kezdesýlerde jıi aıtylǵan usynystar.

Aımaq basshysy bul másele áli de tereń zerdeleýdi qajet etetinin alǵa tartty.

- Zań qabyldanyp ketken soń san soǵyp qalmaıtyndaı halyqtyń eskertý, ótinishteri esepke alynýy kerek. Bul máselede bir jaqty pikir aıtý múmkin emes. Sondyqtan, usynystardy oblys halqynyń pikirin jan-jaqty taldap, negizge ala otyryp respýblıkalyq komıssııa nazaryna usyný qajet,- dedi Nurmuhambet Qanapııauly.

Jergilikti polıtsııa qyzmeti - qoǵamdyq keńestiń nazaryna usynylǵan máseleniń biri. Oblystyń ishki ister departamenti jergilikti polıtsııa qyzmetiniń bastyǵy Jalǵasbaı Jaqaev baıandama jasady.

- Bıylǵy jyldyń málimetine sáıkes, aýyr qylmystar 2,1%-ǵa, tonaý 8,6%-ǵa, buzaqylyq 34%-ǵa tómendegen. Sonymen qatar, otbasylyq-turmystyq kıkil­jińder, jol kólik oqıǵasynda kóz jumatyndar sany azaıǵan.

Jalǵasbaı Sultanǵalıulynyń aıtýynsha, ýchaskelik ınspek­tor­lardyń mártebesin arttyrýǵa ba­ǵyttalǵan jumystar júrgizilýde. Qoǵamdyq tártipke jaýapty ınspektorlar kezekshilikten, túngi patrýlden bosatylǵan. Tek, óz ýchaskeleriniń tynyshtyǵyna jaýap beredi. Polıtsııa qyzmetine sýdaı jańa segiz avtokólik berilgen. Aldaǵy ýaqytta taǵy da kútilýde. Baıandamashynyń málimetinshe jergilikti polıtsııa quramy barynsha tolyqqan. Maýsym aıynda jas mamandar alynyp, jumysqa kirisipti. Tártip saqshylary Temir­taý, Semeı qalalarynda oqý-jattyǵýdan ótedi. Jergilikti polıtsııa bıýdjetin ishki ister departamentinen bólý máselesi de aldaǵy ýaqytta nazardan tys qalmaq emes.

Bıylǵy jyldyń aqpanynan qurylǵan qoǵamdyq keńestiń ju­mysy jaıly keńes hatshysy Natalıa Vshıvtseva egjeı-tegjeıli toqtaldy.

- Búgingi tańda keńes quramynda bes komıssııa jumys isteýde. Olar - bıýdjettik, quqyqtyq, jeke azamattar men zańdy tulǵalardyń ótinishterin qaraıtyn komıssııa, qoǵamdyq baqylaý jáne jer reformasyna qatysty komıssııa. Osy ýaqyt ishinde qoǵamdyq keńestiń bes, komıssııalardyń 12 otyrysy ótti,- dedi hatshy.

Keńes tóraǵasy Erqara Aı­maǵambetov otyrysty qorytyn­dylaı kele, bizdiń oblystyń qoǵamdyq keńesi respýblıka boıynsha aldyńǵy orynda ekenin jetkizdi. Júıeli jumys aldaǵy ýaqytta da jalǵasyn tabary sózsiz.