Qaraǵandyda QR Memlekettik rámizderi kúnine oraı ákim bastaǵan velojarys ótti

Velojarys «Qaraǵandy arena» Muz saraıynan bastalyp, qala ortalyǵyndaǵy Táýelsizdik stelasynyń mańynda márege jetti. Aktsııaǵa 500-ge jýyq adam qatysty, olardyń arasynda memlekettik qyzmetkerler, máslıhat depýtattary, sportshylar jáne áýesqoı velosıpedshiler boldy.

«Týra 20 jyl buryn táýelsiz elimizdiń Týy, Eltańbasy jáne Ánurany qabyldanǵan edi. Bul mereıtoılyq data - árqaısymyz úshin mereke, Otanymyz úshin patrıottyq pen namys merekesi! Búgin Memlekettik rámizder kúni jáne «Biz - qaraǵandylyqtarmyz» aktsııasynyń aıasynda Qaraǵandynyń ortalyq kóshelerinde ártúrli jas ereksheliktegi jáne mamandyqtaǵy adamdardyń qatysýymen uzaqtyǵy 6 shaqyrym 200 metrge sozylǵan velojarys ótýde», - dedi qala ákimi Baýyrjan Ábdishev merekeniń ashylý saltanatynda.

Onyń aıtýynsha, aktsııanyń maqsaty - patrıotızmdi qalyptastyrý, sondaı-aq salaýatty ómir saltyn, deneshynyqtyrý men buqaralyq sportty nasıhattaý. «Biz sondaı-aq HHH jazǵy Olımpıada oıyndaryna qatysatyn, óz jeńisterimen týǵan Qazaqstannyń jáne onyń memlekettik rámizderiniń abyroıyn asqaqtatatyn jerles sportshylarymyzdy qoldaımyz», - dep qosyp ótti qala ákimi.

B.Ábdishev velosıpedshilerdiń kolonnasyn birinshi bolyp bastady. Onyń aıtýynsha, eki dóńgelekti onyń baıyrǵy «dosy» jáne ol bos ýaqytynda veloserýenderge shyǵýǵa tyrysyp otyrady.

Velojarysty ashý quqyǵy eń kishkentaı qatysýshylarǵa berildi. Balalar 3 jáne 4 dóńgelekti velosıpedterdi aıdady. Aktsııanyń barlyq qatysýshylary QR Týy jáne Eltańbasy beınelengen fýtbolkalar men Eltańbasy bar beısbolkalardy kıdi. Kolonnanyń aldynda úlken Memlekettik týmen kabrıoletter júrip otyrdy.

 «Tý, Eltańba, Ánuran - bizdiń ortaq ıgiligimiz, olar bolashaqqa degen senimdi qalyptastyrady. Olar - qazaqstandyq patrıotızmniń, Otanǵa degen mahabbattyń, onyń tarıhyna, memlekettik tiline, mádenıeti men dástúrlerine tereń qurmettiń qalyptasýynyń qaınar kózi. Búgingi shara qaraǵandylyqtardyń patrıottyq sezimderiniń, dostyq merekesiniń, salaýatty ómir saltyn nasıhattaýdyń jarqyn kórinisi boldy», - dep atap ótti aktsııanyń sońynda B.Ábdishev.

Qala ákimi velojarysty dástúrli etý sheshimi qabyldanǵanyn aıtty. Ol jyl saıyn Memlekettik rámizder kúni ótkiziledi. Qala ákimi barlyq qatysýshylarǵa belsendi azamattyq ustanymdary úshin alǵysyn bildirdi. «Sizderdiń bul qadamdaryńyz kóptegen adamdy jigerlendiredi dep senemin.  Jyl saıyn velojarys buqaralyq sıpatqa ıe bola bastaıdy», - dep túıindedi B.Ábdishev.