Qaraǵandyda QR qurmetti jýrnalısi Maǵaýııa Sembaıǵa memorıaldyq taqta ornatyldy

QARAǴANDY. QazAqparat – Qaraǵandy qalasynda Respýblıka dańǵyly, №4 úıdiń qabyrǵasyna QR Eńbek sińirgen qaıratkeri, Qazaqstannyń qurmetti jýrnalısi Maǵaýııa Sembaıǵa memorıaldyq taqta ornatyldy. Bul úıde jýrnalıst qyryq jyldan astam boıy turdy, dep habarlaıdy QazAqparat.

Memorıaldy taqtany Maǵaýııa Sembaıdyń áriptesteri men jaqyndary ornatty.

«Bul, uly jýrnalıst pen tálimgerdi eske alý úshin qolymyzdan keletin sharanyń tek az ǵana bóligi. Bul – bizdiń mindetimiz. Osy taqtanyń ashylýymen Maǵash aǵa úıine oralǵandaı boldy. Ol týǵan-týysqandary men jaqyndarynyń, áriptesteri men shákirtteriniń júreginde máńgi qalady», – dedi Ortalyq Qazaqstan oblystyq gazetiniń bas redaktory Ersin Musabekov.

Maǵaýııa Sembaı Kırov atyndaǵy QazMÝ-dyń jýrnalıstıka fakýltetiniń túlegi. Sońǵy 20 jyl ishinde Ortalyq Qazaqstan gazetiniń bas redaktory boldy. Onyń osy gazettegi jalpy eńbek ótili 40 jyldan asty.