Qaraǵandyda qoımaǵa soǵylyp, qıraǵan avtobýstyń kondýktory qutqaryldy
QARAǴANDY. QazAqparat - Qutqarýshylar Qaraǵandy qalasynyń №5 avtoparkiniń aýmaǵyndaǵy maı qoımasynyń qabyrǵasyna soǵylǵan avtobýstyń ishinen kondýktordy alyp shyqty, dep habarlaıdy QarAqparat tilshisi oblystyq TJD-ǵa silteme jasap.
«30 qańtarda saǵat 17:24-te №5 avtoparkiniń aýmaǵynda oqys oqıǵa bolǵany jóninde habar kelip tústi. Mercedes markaly avtobýs maı qoımasynyń qabyrǵasyna soǵylǵan. TJD kúshimen 1982 jylǵy avtobýs kondýktory qutqarylyp, ol jedel medıtsınalyq járdem qyzmetiniń brıgadasyna tapsyryldy», - dep málimdedi oblystyq TJD-nyń resmı ókili Janna Dáýrenbekova.
Zardap shekken áıel №1 qalalyq aýrýhanaǵa jetkizild.
«Oqıǵa ornyna jedel medıtsınalyq járdem qyzmeti shaqyrtyldy. Brıgada zardap shekken áıeldi №1 qalalyq aýrýhanaǵa jetkizdi. Onda ony travmatolog dárigerler qarap, bel omyrtqasy jaralanǵan degen dıagnoz qoıǵan. Qosymsha taǵy tekserilý kerektigi aıtyldy. Aýrýhanaǵa jatqyzýǵa sebep bolmaǵandyqtan, ol úıine jiberildi. Eger ol ózin nashar sezinse mekenjaıy boıynsha emhanaǵa bara alady», - dep málimdedi oblystyq densaýlyq saqtaý basqarmasynyń baspasóz hatshysy Aıjan Isa.
Avtopark aýmaǵynda qandaı jaǵdaı oryn alǵany jáne avtobýsty kim basqarǵany týraly naqty málimetter joq. Agenttik tilshisiniń telefon qońyraýlaryna mekeme ókilderi jaýap bermedi.
