Qaraǵandyda koronavırýstan kóz jumǵandar arasynda vaktsına saldyrǵandar joq - dáriger
QARAǴANDY. QazAqparat – Qaraǵandynyń №3 emhanasynda kún saıyn 250 adamǵa deıin vaktsına alady. Egý kabınetterine 800 adamǵa deıin qyzmet kórsetetin kúnder boldy. Medıtsınalyq mekeme halyqtyń ujymdyq ımmýnıtetin damytý úshin taǵy da qosymsha egý pýnktterin ornalastyrýǵa daıyn, dep habarlaıdy QazAqparat tilshisi.
Búgingi tańda emhanada vaktsınalardyń birinshi komponentin 21 myń turǵyn aldy. Taǵy 17 myń adam ekinshi komponentpen egildi. Vaktsınatsııadan bir de bir ólim oqıǵasy, sondaı-aq kúrdeli allergııalyq reaktsııalar tirkelgen joq.
Vaktsınatsııanyń birinshi kezeńinen keıin ózińizdi qorǵalǵan dep sanaýǵa bolmaıdy.
KVI-ǵa ımmýnıtet ekinshi komponentti alǵannan keıin úsh aptadan keıin ǵana paıda bolady.
Biraq tolyq vaktsınatsııadan keıin de vırýstan qorǵaý sharalaryn umytpaǵan jón.
«Vaktsınatsııa – koronavırýstyq ınfektsııamen kúrestegi jalǵyz tıimdi ádis. Árıne, juqtyrý qaýpi bar. Biraq onyń paıyzy tómen bolady. Men kún saıyn KVI-ǵa testi nátıjesi oń bolǵan adamdardyń tizimin tekseremin. Onyń ishinde vaktsınatsııalanǵandar úlesi 1-2% quraıdy. Bul ekpeniń tıimdiligin kórsetedi. Qazirgi ýaqytta vaktsınatsııadan bir de bir ólim oqıǵasy, sondaı-aq aǵzanyń qandaı da bir kúrdeli reaktsııasy tirkelgen joq. Ádette, vaktsınatsııadan keıin adamdarda kútiletin ımmýndyq reaktsııa temperatýra, deneniń aýyrýy, álsizdik jáne bas aýrýy túrinde bolady. Ol úsh kúnnen aspaıdy», - deıdi emhana dırektorynyń orynbasary Vıktor Mýzafarov.
Búgingi tańda №3 emhanada eki vaktsına qoldanylady – QazVac jáne «Spýtnık V». Olar arnaıy muzdatqyshtarda mınýs 20-dan mınýs 30 gradýsqa deıingi temperatýrada saqtalady.
Barlyq tońazytqyshtar úzdiksiz elektrmen jabdyqtaýdy qamtamasyz etetin eki generatorǵa qosylǵan.
«Vaktsınatsııaǵa qarsy kórsetilimder bar. Bul - júktilik, laktatsııa kezeńi, 18 jasqa deıin jáne aýyr allergııalyq reaktsııa. Barlyq osy jaǵdaılarda biz patsıentterge medıtsınalyq kómek kórsetemiz. Al qalǵandaryna ekpe salýǵa keńes beremiz, sebebi tek osylaı ǵana biz pandemııadan shyǵa alamyz. Biz qazir jazba boıynsha da, kezek tártibinde de qabyldaımyz. Barlyq nıet bildirýshilerdi qabyldaımyz: tirkelgender, tirkelmegender, sheteldikter jáne tipti qujattary joq patsıentter. Sondaı-aq, biz óndiristik kásiporyndarǵa shyǵý brıgadalarynyń qyzmetterin kórsetemiz», – deıdi Vıktor Mýzafarov.
