Qaraǵandyda koronavırýspen kúresip júrgen 4,6 myń medqyzmetker ústemeaqy alady
QARAǴANDY. QazAqparat - Medıtsınalyq saqtandyrý qory COVID-19-ǵa qarsy kúreske tartylǵan qyzmetkerlerge qosymsha aqy tóleıdi. Qaraǵandy oblysynda 4 610 medıtsına qyzmetkerleri maýsym aıyna qosymsha ústemeaqy alady. Bul tólemder úshin respýblıkalyq bıýdjet qarajatynan medıtsınalyq saqtandyrý qoryna 3,03 mlrd teńge bólindi, dep habarlaıdy QazAqparat tilshisi.
Naýryz aıynan maýsym aıyna deıin qor qarjy operatory retinde medqyzmetkerlerdiń jalaqysyna qosymsha 2,57 mlrd teńgeden astam qarjy tólegen.
Oblysta aı saıyn qaýipti vırýspen jumys isteıtin dárigerler sany ósip jatyr. Eger naýryz aıynda ústemeaqyny 1 356 qyzmetker alsa, mamyr aıynda olardyń sany 3 522 adamǵa deıin ósti.
Ústemeaqy mólsheri QR Densaýlyq saqtaý mınıstrliginiń buıryǵymen belgilengen. Táýekel tobyna baılanysty medıtsına qyzmetkerlerine qosymsha aqy - 212 myń teńgeden 850 myń teńgege deıin.
«Ústemeaqy alýshylar tizimin jedel shtab janynan qurylǵan óńirlik komıssııalar bekitedi. Komıssııa tóraǵalary - ákimderdiń orynbasarlary. Onyń quramyna sondaı-aq medıtsınalyq saqtandyrý qory fılıaldarynyń qyzmetkerleri, óńirlik bas memlekettik sanıtar dáriger, densaýlyq saqtaý basqarmalarynyń, úkimettik emes uıymdardyń, kásipodaq ókilderi kiredi», - dep túsindirdi Medıtsınalyq saqtandyrý qorynyń Qaraǵandy fılıalynyń baspasóz qyzmeti .
Medıtsınalyq saqtandyrý qory tizim boıynsha derekterdiń durystyǵyn, Densaýlyq saqtaý mınıstriniń buıryǵyna sáıkestigin tekseredi.
Eger medıtsınalyq qyzmetkerlerde ústemeaqyǵa qatysty suraqtar týyndasa, olar óńirlik komıssııalarǵa júgine alady.
Koronavırýspen aýyrǵan dárigerlerge arnalǵan tólem QR Eńbek jáne áleýmettik qorǵaý mınıstrligi men óńirlik komıssııa sheshimi negizinde tólenedi.
