Qaraǵandyda koronavırýs juqtyrǵan 3 adam aýyr halde jatyr
QARAǴANDY. QazAqparat –Qaraǵandy oblysynda 6 sáýir kúni taǵy 16 adamnan COVID-19 anyqtaldy. Vırýs juqtyrǵandardyń barlyǵy – koronavırýstan qaıtys bolǵan adamnyń otbasy músheleri jáne onymen baılanysta bolǵandar. Bul týraly QazAqparat coronavirus2020.kz saıtyna silteme jasap habarlaıdy.
Olardyń barlyǵy indetke qarsy qaýipsizdiktiń qajetti sharalaryn saqtaı otyryp oqshaýlanǵan jáne em qabyldaýda.
Qaraǵandy oblysynda 6 sáýirdegi jaǵdaı boıynsha koronavırýs juqtyrǵandardyń jalpy sany – 48. Úsh naýqas reanımatsııada aýyr halde jatyr, olardyń bireýi ózdiginen tynys alady. Taǵy úsheýiniń jaǵdaıy – ortasha aýyr deńgeıde.
Barlyq juqtyrýy múmkin adamdardy anyqtaý úshin muqııat epıdemıologııalyq tekserý júrgizilýde. Vırýs juqtyrǵan adamdarmen baılanysta bolǵandar oqshaýlanǵan.
Qaraǵandy oblysynda úı karantıninde 1 346 adam jatyr. 862 patsıent táýlik boıy baqylaýda, onyń ishinde 48-i ınfektsııalyq statsıonarda.
Pnevmonııa men JRVI-ǵa kúdigi bar naýqastardy emdeý úshin oblys qalalarynda pýlmonologııalyq ortalyqtar ashyldy. Vırýstyq ınfektsııamen aýyratyn naýqastarǵa mamandandyrylǵan jedel brıgadalar qyzmet kórsetedi.
