Qaraǵandyda kóppáterli úıde gaz ballony jaryldy - TJD (FOTO)
ASTANA. QazAqparat - Qaraǵandy qalasynda 23-shi shaǵyn aýdandaǵy kóp páterli úıde ballondaǵy gazdyń shyǵýy saldarynan qoparylys boldy. Apattan 3 adam zardap shekti, onyń bireýi 6 jasar bala, dep habarlaıdy oblystyq TJD-nyń baspasóz qyzmeti.
«23 qańtarda saǵat 15:50-de «112» nómirine Qaraǵandy qalasy Oktıabr aýdany 23-shaǵynaýdanyń №8 úıinde jarylys bolǵany jóninde habar kelip tústi», - delingen habarlamada.
Oqıǵa ornyna Qaraǵandy oblystyq TJD-nyń jáne oǵan baǵynysty qurylymdyq bólimsheniń kúshteri jiberilgen.
Apat ornyna kelip jetken qutqarýshylar úıdiń 4-shi qabatyndaǵy
№11 páterde gaz qospasynyń jarylǵanyn anyqtady (5 lıtrlik gaz ballony).
Jarylys saldarynan №11 páterde 40 sharshy metr aýmaqta bólmelerdiń araqabyrǵasy (as úı, jýynatyn bólme, dáliz jáne qonaq bólmesiniń jarty qabyrǵasy) qulaǵan, №11 jáne №12 páterdiń arasyn bóletin qabyrǵa qulaǵan (18 sh.m.) №12 jáne №23 páter aralyǵyndaǵy qabyrǵa qısaıǵan, №11,12,15 páterlerdiń terezeleri synǵan. Júkteme túsetin syrtqy qabyrǵalarda kózge kórinetin búliný joq, №11 jáne 3 qabattaǵy №7 páter arasyndaǵy jabyndy plıta maıysqan.
Úsh adam jaraqat aldy: №11 páterde 1976 jyly týǵan er adam men 1972 jyly týǵan kelinshek kúıikke shaldyqqan, olar Maqajanov atyndaǵy emhanaǵa jatqyzyldy, kórshiles №12 páterdegi alty jasar ul bala túrli jaraqattarmen (aldyn ala dıagnoz: jabyq bas jaraqaty, mıdyń shaıqalýy, ıyqtyń synýy) Oblystyq medıtsınalyq ortalyqqa jatqyzyldy.
15 adam qaýipsiz jerge kóshirildi.
Úıdegi jylý júıesine zaqym kelmegen. Osy kireberis tolyǵymen elektr toǵynan ajyratyldy. Baspanasyna zaqym kelgender týǵan-týystarynyń úılerine ornalastyryldy. Ýaqytsha baspanaǵa muqtajdarǵa qala ákimdigi kásibı lıtseıdiń №2 jataqhanasyn ázirlep qoıdy.
Apattyq-qutqarý jumystaryna 77 qyzmetker jáne 21 tehnıka jumyldyryldy.
