Qaraǵandyda kópqabatty úı órtenip, 1 adam qaza boldy, 19-y qutqaryldy
QARAǴANDY. QazAqparat – Qaraǵandy qalasynda kópqabatty úılerdiń birinen órt shyǵyp, mamandar 19 adamdy qutqaryp, evakýatsııalady. Ysty gazǵa ýlanǵan qart áıel jedel járdem kóliginde qaıtys boldy, dep habarlaıdy QazAqparat tilshisi.
Qaraǵandy qalasy Kúzembaev kóshesindegi 5 qabatty turǵyn úıde órt shyqqany týraly habarlama 10 naýryz, saǵat 03:26-da túsken.
Shaqyrý ornyna jetken órt sóndirý bólimsheleri kireberistegi qatty tútindi baıqaǵan. Gaz-tútinnen qorǵaý qyzmetiniń eki toby barlaýǵa, podezd turǵyndaryn qutqarýǵa jáne evakýatsııalaýǵa baǵyttaldy.
«Qatty tútinniń saldarynan 4-shi qabatta ornalasqan páterden óz betinshe evakýatsııalanýǵa tyrysqan anasy men balasy tabyldy. 1946 jyly týǵan áıel ýly gazdan ýlanyp, jedel járdem kóliginde kóz jumdy», - dep málim etti Qaraǵandy oblystyq Tótenshe jaǵdaılar departamentiniń baspasóz qyzmetinen.
Órt sóndirýshi-qutqarýshylar avtosatynyń kómegimen osy kireberistiń páterlerinen 4 adam, onyń ishinde 3 balany qutqardy. Sondaı-aq, baspaldaq marshy boıynsha 15 adam, onyń ishinde 4 bala evakýatsııalandy.
Besinshi qabattaǵy páterden eki adam aýrýhanaǵa jatqyzyldy – ana men bala ıis tıip ýlanǵan.
Jalyn 1-shi qabattaǵy baspaldaqtyń astynda ornalasqan aǵash qoımadan shyqqan. Órt sóndirýshiler janyp jatqan qoımadan syıymdylyǵy 27 lıtr bos gaz ballonyn alyp shyqty. Órttiń jalpy aýdany 3 sharshy metrdi qurady.
Órt bolǵan jerge Qaraǵandy oblysy TJD-niń 12 adamy men 3 tehnıkasy jumyldyryldy. Qabyldanǵan sharalarmen órt saǵat 03:49-da sóndirildi.
Aldyn ala boljam boıynsha órttiń sebebi ashyq ot kózi boldy.
TJD mamandary órt shyqqan kezde ustanatyn erejelerdi eske salady:
- Órttiń alǵashqy belgilerinde birden 101 nemese 112 nómirine qońyraý shalý qajet. Eshbir jaǵdaıda dúrbeleńge boı aldyrmańyz!
- Qatty tútindi keńistikte eńbektep nemese eńkeıip qozǵalý kerek. Sebebi tómende tútin az bolady. Muryn men aýyzdy dymqyl shúberekpen, súlgimen jáne ózge zatpen jabý kerek.
- Eger shyǵý joly ot nemese tútinmen jabyq bolsa jáne baspaldaq marshymen júgirýge múmkindik bolmasa, balkonǵa shyǵyp, balkon esigin myqtap jaýyp nemese tereze aldynda turý kerek.
- Esińizde bolsyn! Órt kezinde lıftini paıdalanýǵa tyıym salynady.
Sondaı-aq qutqarýshylar azamattardan óz qaýipsizdigi máselesine muqııat, baıypty qaraýdy jáne turmysta órt qaýipsizdigi erejelerin saqtaýdy suraıdy:
- sóndirilmegen temekilerdi, sirińkelerdi, shyraqtardy jáne basqa da ot kózderin qaldyrmańyz;
- elektr symdary men aspaptarynyń jaramdylyǵyn qadaǵalańyz;
- elektr jelilerin shamadan tys júktemeńiz;
- tek jaramdy pesh, gaz, elektr jabdyqtaryn paıdalaný qajet.
