Qaraǵandyda Konstıtýtsııa kúnine oraı batyl polıtseı týraly fılm tanystyryldy
Qaraǵandy oblystyq polıtsııa departamentiniń polıtseıleri Konstıtýtsııa kúnin merekeleýge arnalǵan saltanatty is-shara ótkizdi.
Qaraǵandy oblystyq PD bastyǵy polıtsııa polkovnıgi Erlan Faızýllın atap ótkendeı, «qaraǵandylyq polıtseıler azamattardyń múddesi men zańdy quqyqtaryn udaıy qamtamasyz etedi. Sebebi, bizge artylǵan mindettiń nátıjesi qoǵamnyń damýyna, Qazaqstannyń ekonomıkalyq qýatty jáne táýelsiz el retinde ári qaraı qalyptasýyna tikeleı qatysty».
Saltanatty is-shara barysynda qyzmet barysynda joǵary nátıjeler kórsetken 200 ofıtser men serjant QR Konstıtýtsııa kúnin merekeleý qurmetine tós belgilermen, gramotalarmen jáne alǵys hattarmen marapattaldy.
Sondaı-aq, jıyn barysynda qonaqtar men polıtsııa qyzmetkerlerine «Ádilettikke aparar jol» fılmi kórsetildi. Fılm jelisi ómirde bolǵan oqıǵaǵa negizdelgen. Ol 130 balanyń ómirin saqtap qalyp, ózin qurban etken polıtsııa qyzmetkeri týraly oqıǵa.
Fılm túsirilgen oqıǵa «Almaty - Ekaterınbýrg» tasjolynda 2008 jyldyń mamyrynda bolǵan. Eki polıtseı balalar zardap shegýi múmkin jol apatynyń aldyn aldy. Dmıtrıı Pýgach pen Qaırat Jumabekov sol kúni elordaǵa jol tartqan, ishinde balalar bar úsh avtobýsty arnaıy polıtsııa mashınasymen alyp bara jatqan.
Qaraǵandylyq polıtseıler avtobýstardyń aldynda kele jatqan. Kenetten qarsy jolaqtan aldynda kele jatqan sheteldik kólikten ozbaq bolǵan júk kóligi shyǵyp qalady. Qaırat Jumabekov pen Dmıtrıı Pýgach júk kóligi balalar bar avtobýsqa soǵylmas úshin júk kóliktiń aldyna óz kólikterimen shyǵady. Olar KamAZ júk kóliginiń avtobýspen soqtyǵysýyna jol bermeıdi. Jol-kólik oqıǵasy saldarynan Dmıtrıı Pýgach túrli jaraqatpen aýrýhanaǵa jetkizildi, dárigerler ony qutqaryp qaldy. Al, Qaırat Jumabekov apat bolǵan jerde qaza tapty. Keıin polıtsııa serjanty Qaırat Jumabekov QR Prezıdentiniń Jarlyǵymen ІІ deńgeıli «Aıbyn» ordenimen marapattaldy.
Aıta ketken jón, rólderdi kásibı emes akterlar, ishki ister organdarynyń qyzmetkerleri somdaǵan.
«Qaırattyń batyrlyǵy bizdiń júregimizde máńgige qalady. Qaırat Jumabekovtyń otbasyna alǵys aıtýǵa ruqsat etińizder. Fılmge qatysqan ardagerlerge, balalarǵa rahmet. Bizdiń, quqyq qorǵaý organdary qyzmetkerleriniń aldynda basty mindet – azamattardyń quqyqtyq qorǵalýyn joǵary deńgeıde qamtamasyz etý», - dep atap ótti oblystyń bas polıtseıi Erlan Faızýllın.
Sondaı-aq, fılmge Qaırat Jumabekovtyń uly Ǵalym Qaıratuly qatysty.
