Qaraǵandyda komıssııa mektep oqýshysynyń qaza tabýyna baılanysty tekserýdi aıaqtady
QARAǴANDY. QazAqparat - Qaraǵandyda №23 orta mekteptiń 7-synyp oqýshysynyń páterinde asýly kúıi tabylý faktisi boıynsha qyzmettik tekserý aıaqtaldy, dep habarlaıdy «QazAqparat» HAA tilshisi.
Qyzmettik tekserýdi vedomstvodaǵy birneshe bólimderdegi laýazymdy tulǵalar júrgizgen. Olar mekteptegi bilim berý protsesiniń oqýshy qyzben bolǵan jaǵdaıǵa qatysy joq ekendigin anyqtady.
«Jasóspirim qyz mektepte qandaı da bir daýly jaǵdaıǵa tap bolmaǵan, qurdastary men basqa synyptardaǵy oqýshylarmen jaqsy aralasqan. Belsendi bolǵan. Tekserý kórsetkendeı, mektepte de, otbasynda da ahýal tynysh, birqalypty bolǵan», - dep málim etti «Qaraǵandy bilim berý bólimi» MM Mektepke deıingi jáne orta bilim bilim berý sektorynyń jetekshisi Natalıa Golovına.
Qaraǵandyda ár mektepte oqýshylardyń akkaýnttaryn buǵattaıtyn arnaıy baǵdarlama ornatylǵan. Alaıda, qaza tapqan qyz áleýmettik jeli arqyly sýıtsıd týraly sóılesken joǵary synyp oqýshysymen únemi baılanysta bolǵan.
«Arnaıy baǵdarlama arqyly ata-analardyń jazbasha ruqsatymen oqýshylardyń akkaýnttary buǵattalady, bul olardyń úziliste jáne sabaq kezinde áleýmettik jelide otyrmaýy úshin jasalǵan. Alaıda, bilim alýshylar basqa akkaýnttar ashyp, solarmen kirip júr», - dedi Natalıa Golovına.
Qaza tapqan qyz otbasynda úsh balanyń úlkeni bolǵan.
Eske salaıyq, 3 aqpan kúni keshkisin Qaraǵandyda № 23 orta mekteptiń jetinshi synyp oqýshysy óz-ózine qol jumsaǵan. Polıtsııa oqıǵanyń mán-jaıyn tekserip jatyr. Páterde anasy úsh jasar balasymen qalǵan. Ákesi men úıdiń ortanshysy jattyǵýda bolǵan.
