Qaraǵandyda kólik júrgizýshisinen oqtalǵan tapansha tabyldy
QARAǴANDY. QazAqparat – Qaraǵandy polıtseıleri toqtatylǵan kólikten oqtalǵan tapansha taýyp aldy, dep habarlaıdy QazAqparat tilshisi Qaraǵandy oblystyq Polıtsııa departamentiniń baspasóz qyzmetine silteme jasap.
Oblystyq Polıtsııa departamentiniń Krımınaldyq polıtsııa jáne arnaıy maqsattaǵy bólim qyzmetkerleri qarý-jaraqtyń zańsyz aınalymymen baılanysty qylmystardy anyqtaý jáne olardyń aldyn alý maqsatynda jedel-izdestirý sharalaryn ótkizip, 8 tamyz kúni Qaraǵandy qalasynyń Volgodonskaıa kóshesinde «Gaz-3102» avtokóligin toqtatqan. Polıtsııa qyzmetkerleri 34 jastaǵy er adamnyń basqarýyndaǵy mashınany tekserý barysynda oqjatarynda 8 patrony bar «TT» markaly tapanshany taýyp, tárkiledi. Qarý 1940 jyly shyǵarylǵany belgili boldy.
Qazirgi tańda polıtsııa qyzmetkerleri barlyq mán-jaıdy tekserip, ustalǵan azamattyń ózimen birge qarýdy qandaı sebeppen alyp júrgenin anyqtap jatyr.
«Atalǵan fakti boıynsha QR QK 287-baby 3-bóligi boıynsha sotqa deıingi tergeý bastaldy. Tıisti saraptamalar taǵaıyndalyp, tergeý júrgizilýde», - dep habarlady Qaraǵandy oblysy PD baspasóz qyzmetinen.
