Qaraǵandyda qoqys tasıtyn kólikti urlap ketti
QARAǴANDY. QazAqparat - Qaraǵandyda belgisiz bireýler iri gabarıtti qoqystardy shyǵarýǵa arnalǵan júk kóligin urlap ketti, dep habarlaıdy QazAqparat Liter.kz saıtyna silteme jasap.
«2014 jyly shyǵarylǵan memlekettik nomeri - 591 AO/09, «KamAZ» kóligi urlandy. Oǵan 2015 jyly shyǵarylǵan memlekettik nomeri 17SKA/09, «NefAZ» tirkemesi jalǵanǵan. Mashınalar «Qaraǵandy Qalalyq kommýnaldyq kólikter» JShS-ǵa tıesili», - dedi kásiporynnan.
Kólikti Buqar jyraý aýdanynda Úshtóbe aýyly men Qurylys kentiniń arasyndaǵy dalaly aımaqta aıdap ketken.
Kompanııa ókilderi qoqys tasıtyn mashınanyń kimge kerek bolǵanyn túsinbeı dal. Bul rette, ony basqa maqsattarda ońaı qoldanýǵa bolatynyn atap ótýde.
«Bul kólikti turǵyndardyń laqtyrǵan eski tehnıkalaryn - tońazytqyshtardy, jıhazdy, ózge úı tehnıkalaryn shyǵarýǵa qoldanatynbyz. Zań boıynsha muny jasaýǵa mindetti emespiz. Adamdar kólikti ózderi jaldap, olardy polıgonǵa jetkizýi kerek. Biraq turǵyndar bul erejeni buzyp keledi», - dep atap ótti kásiporynnan.
Kompanııa basshylyǵy urlanǵan kólik týraly qandaı da málimetke ıe azamattardy polıtsııaǵa habarlasýdy suraıdy. Aqparat úshin syıaqy taǵaıyndaldy.
