Qaraǵandyda kóktaıǵaq saldarynan bir táýlikte 38 jol apaty boldy

QARAǴANDY. QazAqparat – Ótken táýlikte Qaraǵandy qalasynyń joldarynda 38 apat tirkeldi. Birneshe adam jaraqat alyp, aýrýhanalarǵa jetkizildi, dep habarlaıdy QazAqparat tilshisi.

Aýa raıynyń kúrt ózgerýi Qaraǵandydaǵy jol apaty boıynsha statıstıkany ulǵaıtty. Kóptegen avtokólik júrgizýshileri jazǵy shınalaryn qysqyǵa aýystyryp úlgermegen. Nátıjesinde ótken táýlikte qalada 38 jol-kólik oqıǵasy oryn aldy.

«27 qazannan bastap qazirgi ýaqytqa deıin 38 jol-kólik oqıǵasy oryn aldy, onyń ishinde jeti jaǵdaıda zardap shekkender bar. Túrli jaraqattarmen medıtsınalyq mekemelerge 9 adam jetkizildi», - dep málimdedi Qaraǵandy oblysy PD baspasóz qyzmeti.

Qaraǵandy oblysy PD jergilikti polıtsııa qyzmeti basqarmasy qys mezgiliniń bastalýy qarsańynda turǵyndardan jol qozǵalysy erejelerin saqtaýdy, jaıaý júrginshiler ótkelderi ornalasqan jerlerde qyraǵy jáne muqııat bolýdy suraıdy, al kólik quraldarynyń júrgizýshilerine jazǵy shınany qysqyǵa ýaqtyly aýystyrýdy usynady.