Qaraǵandyda kóktaıǵaq kesirinen kólik júrgizýshisi ajal qushty
QARAǴANDY. QazAqparat - Prıshahtınsk jol ótpesindegi jan túrshigerlik jol-kólik apaty jas jigittiń ómirin qıdy, dep jazdy ekaraganda.kz.
25 qazan kúni Temirtaý qalasyna baǵyt alǵan 26 jastaǵy «Prıora» kóliginiń júrgizýshisi «DAFAS» avtoortalyǵy mańynda jol-kólik apatyna ushardy. Aldyn ala boljam boıynsha, júrgizýshi kóktaıǵaqta rýlge ıe bola almaı, qarsy qozǵalys jolaǵyna ótip ketken jáne avtobýspen soqtyǵysqan. Al avtobýs «Pejo» kóligin soqqan.
Jol-kólik apatynan úsh avtokólikke de mehanıkalyq zaqym keldi. Oqıǵa ornynda 26 jastaǵy «Prıora» júrgizýshisi mert boldy. Ózge zardap shegýshilerge medıtsınalyq kómek kórsetildi. «Temirtaý-Qaraǵandy» avtojolyndaǵy jol-kólik apaty faktisi boıynsha QR QK 345-baby 4-bólimi boıynsha sotqa deıingi tergeý jumystary bastaldy, birqatar saraptamalar taǵaıyndaldy.
Aýa raıy jaǵdaıynyń nasharlaýyna baılanysty Qaraǵandy oblystyq ІІD qyzmetkerleri barlyq kólik quraldarynyń júrgizýshilerine jolda abaı bolýdy eskertedi.
