Qaraǵandyda kezbe urylar zeınetkerlerge jalǵan aqsha bergen
QARAǴANDY. QazAqparat -Almaty jáne Aqtóbe oblystarynyń alaıaqtar toby Qaraǵandyda birneshe zeınetkerdiń qaltasyn qaqty, dep habarlaıdy «QazAqparat» HAA tilshisi.
Qaraǵandy oblysy ІІD baspasóz qyzmetiniń habarlaýynsha, qarttardy aldap soǵýda alaıaqtar túrli ádisti paıdalanǵan. Bir jaǵdaıda qaskóıler Qaraǵandy saýda úıleriniń birinen kádesyılyq aqshalardy satyp alǵan jáne ózderin áleýmettik qyzmetker retinde tanystyryp, jalǵan aqshaǵa qarttardyń zeınetaqysyn aıyrbastap alǵan.
Endigi bir jaǵdaıda qylmyskerler qarttarǵa jınalǵan barlyq zeınetaqyny jeńildik kartalaryna aýdaryp, azyq-túlik pen dárilik zattardy arzan baǵamen satyp alý týraly «ertegi» aıtqan.
«Olar kóshede aldaý jolymen 85 jastaǵy ájeıdiń 500 myń teńgesin alý kezinde ustaldy. Kezbe urylar tobynyń quramynda Almaty jáne Aqtóbe oblysynyń týmalary bar. Bul topta bir áıel bar. Rólderdi bólip alǵan alaıaqtar jalǵyzbasty zeınetkerlerdi izdegen jáne kóp jaǵdaıda izdeýshisi joq zeınetkerler alaıaqtyq qurbanyna aınalǵan», - dep habarlady óńirlik ІІD baspasóz qyzmetiniń basshysy Baqytjan Qudııarov.
Qylmystyq toptyń ońaı jolmen aqsha tabý josparyn ózbekstandyq azamattan alǵany belgili boldy. Tashkent turǵyny qarttardy aldaýdyń búge-shigesine deıin úıretken. Ustalǵandardyń eń úlkeni 41 jasta, eń kishisi 32 jasta. Olar ýaqytsha ustaý oqshaýlaǵyshyna qamaldy.
QR QK 190-baby «Alaıaqtyq» boıynsha sotqa deıingi tergeý jumystary júrip jatyr.
