Qaraǵandyda kepilge alynǵan qyzdy qutqarýǵa kómektesken ımam marapattaldy
QARAǴANDY. QazAqparat - Qaraǵandy qalasy ortalyq meshitiniń ımamy Ómirzaq Bekqojaǵa tutqynǵa alynǵan balany qutqarǵany úshin ІІM belgisi bar qolsaǵat tabys etildi, dep habarlaıdy QazAqparat tilshisi.
Qaraǵandy oblysynyń polıtsııa departamentinde vedomstvonyń jedel-qyzmettik jumysynyń qorytyndysyn shyǵarý boıynsha keńeıtilgen keńes ótti.
Jıyn barysynda Qaraǵandy oblysy PD bastyǵynyń mindetin atqarýshy Erlan Faızýllın Ortalyq meshit ımamy Ómirzaq Bekqojany saltanatty túrde marapattap, basshylyqtyń atynan shuǵyl jaǵdaıda tutqyndy qutqarýda joǵary azamattyq ustanymyn tanytyp, polıtseılerge kómek kórsetkeni úshin alǵys aıtty.
Esterińizge sala keteıik, 17 sáýir kúni 34 jastaǵy qala turǵyny otbasylyq janjaldan keıin týystaryn páterden qýyp shyǵyp, kishkentaı qyzyn kepilge alǵan bolatyn. Polıtseıler qaýipsizdik úshin qalanyń barlyq shuǵyl qyzmetin jumyldyrdy. PD basshylyǵy kepilge alynǵan búldirshindi qutqarý úshin shuǵyl operatsııa júrgizdi. Uzaqmerzimdi kelissóz barysynda arnaıy bólimsheniń polıtseıleri ımamnyń kómegimen qalanyń ortalyq meshitinde qylmyskerdi zalalsyzdandyryp, tutqynǵa alynǵan balany qutqardy. Operatsııa kezinde eshkim zardap shekken joq.
Aıta ketý kerek, ótken jyly qoǵamdaǵy keleńsizdikterge nemquraıly qaramaıtyn azamattardyń kómegimen 31 qylmys ashylyp, 480-den astam quqyq buzýshylyq anyqtaldy. Polıtsııa departamentiniń basshylyǵy 35 azamatty gramotamen marapattaǵan.
