Qaraǵandyda Keńes Odaǵynyń Batyry Martbek Mamyraevtyń músini ashyldy
ASTANA. QazAqparat - Qaraǵandyda Oktıabr aýdanyndaǵy áskerı-tehnıkalyq mektep janynda Keńes Odaǵynyń Batyry Martbek Mamyraevtiń músini ashyldy, dep habarlaıdy óńir ákimdiginiń resmı saıty .
Áskerı-tehnıkalyq mektep Martbek Mamyraevtyń atyn ıelengen. Músinniń avtory sáýletshi Elı Kachýev. Saltanatty ashylý rásiminde batyrdyń týystary men qyzy Klara Martbekqyzy Mamyraeva, sonymen qatar qalalyq máslıhat hatshysy Qudaıbergen Beksultanov, Oktıabr aýdanynyń ákimi Álimjan Qanaev, ardagerler keńesiniń tóraǵasy Marat Seıfýlluly Aımaǵambetov qatysty.
Martbek Mamyraev - 1908 jyly 2 naýryzda №20 aýylda (qazirgi Qarqaraly aýdanynyń Aqjol aýylynda) dúnıege kelgen. 1942 jyly Uly Otan soǵysyna attanady. Dneprdi alýda tanytqan áskerı erligi úshin Martbek Mamyraevqa KSRO Joǵary Keńesiniń Prezıdıýmy Jarlyǵymen 1944 jyly 15 qańtarda Keńes Odaǵynyń Batyry ataǵy men Lenın ordeni jáne «Altyn juldyz» medali berilgen. Keńes áskeriniń quramynan demobılızatsııalanǵan soń Martbek Mamyraev Kırov atyndaǵy shahtada partııa uıymyn basqardy, odan keıin Qraǵandy qalasynyń Lenın aýdandyq partııa komıtetiniń birinshi hatshysy boldy, kenshiler astanasy atqarý komıteti tóraǵasynyń orynbasarlyǵyna saılandy. Ómiriniń sońǵy kezinde ol hımııa-metallýrgııa ınstıtýtynda eńbek etti.
