Qaraǵandyda keme modeldeý boıynsha Qazaqstan chempıonaty ótýde
QARAǴANDY. QazAqparat – Keme jasaý sporty boıynsha Qazaqstan Respýblıkasynyń XXVI chempıonatyna Qaraǵandyǵa segiz oblystan komandalar jınaldy. Sharaǵa qatysyp jatqan 70-ke jýyq adam 100-den astam keme úlgisin usyndy, dep habarlaıdy QazAqparat.
«Ortalyq saıabaqtaǵy shaǵyn kól keme jasaýshylar úshin óte yńǵaıly. Sý aıdyny qajetti mólsherge saı keledi. Stendtik shoý jáne naqty kemelerdiń dál kóshirmeleri bolyp tabylatyn modelderdiń starty ótedi. Sondaı-aq radıo arqyly basqarylatyn súńgýir qaıyqtardyń jarysy uıymdastyrylady. Bul, birneshe jyl buryn paıda bolǵan jańa synyptardyń biri. Qaraǵandy tehnıkalyq sport túrleri mektebiniń myqty básekelesi – Aqtóbe men Oral komandalary», – deıdi jarystyń tóreshisi, keme jasaý sporty boıynsha álem chempıony Sergeı Okonechnıkov.
Barlyq kemeler – bul úlken áskerı jáne azamattyq kemelerdiń shaǵyn modelderi. Olardy jınaý úshin birneshe jyl qajet. Qazaqstanda modelderdiń 60-qa jýyq túri bar.
«Mende model retinde Ekinshi dúnıejúzilik soǵysy kezinde salynǵan eń myqty nemis lınkorlarynyń biri bar. Eń qıyny kesý boldy, sebebi keme kóptegen usaq bólshekterden quraldy. Jarysqa qatysý óte qyzyqty, men jaqsy óner kórsetemin dep úmittenemin», – deıdi jas dızaıner Nıkıta Lınkov.
Modelder 100 baldyq júıe boıynsha baǵalanady. Tóreshiler stendtik jáne júzý synaqtary boıynsha jeke-jeke baǵa beredi. Jarys 27 maýsymǵa deıin jalǵasady. Úzdik úlgi avtorlary dıplomdarmen jáne Qazaqstan chempıondarynyń sertıfıkattalǵan medaldaryna ıe bolady.
Jarys týraly alǵan áserlerimen Qaraǵandy oblysynyń aǵa keme dızaıneri Aleksandr Levanov bólisti.
«Men ózim 60 jyldan astam ýaqyt osy sport túrimen aınalysyp kelemin. 9 jasymda keldim. Qazir uldardyń qyzyǵýshylyǵy bar ekenin kóremin, biraq bizdiń zamanymyzdaǵydaı emes. Bul, túsinikti, árıne. Kompıýterler, telefondar bar. Qazir uldar elektronıkany jaqsy biledi. Eger memleket tehnıkalyq sport túrlerin odan ári qoldaıtyn bolsa, onda keme jasaý sportynyń bolashaǵy bar», – dedi ol.
