Qaraǵandyda «Qazposhtanyń» alǵashqy sandyq keńsesi ashyldy
Jańa keńse «Gúlder-1» shaǵyn aýdany, 2a úı mekenjaıy boıynsha ornalasqan. Jańa bólimshege kelýshilerdi Qýanysh atty robot qarsy alady. Ol adamnyń bet-álpetin tanyp, «Qazposhta» jumysyna qatysty suraqtarǵa jaýap beredi, sonymen qatar ol bıleıdi jáne ázildeıdi. Bólimshede sondaı-aq Sáýle atty sandyq keńesshi, aqshany qabyldaı jáne bere alatyn, jáne de úsh mınýtta ǵalamtor arqyly saýda jasaýǵa arnalǵan kartany beretin gıbrıdti bankomat bar.
Sandyq bólimsheniń ashylý saltanatyna Qaraǵandy oblysynyń ákimi Erlan Qoshanov qatysty. Aımaq basshysyna jańa tehnıka tanystyryldy, tehnıka jumysynyń jyldamdyǵyn tekserý úshin gıbrıdti bankomattyń kómegimen oǵan tólem kartasy jasaldy.
Kelýshiler postamattardy paıdalanyp, «elektrondy kassır» júıesi qyzmetin ala alady.
«Elektrondy kassır» óte yńǵaıly, mysalǵa, bıznesmender úshin. Keshkilik olardyń kóbisinde iri somada aqsha bolady. Sondyqtan ne ınkassatsııany shaqyrýǵa, ne bolmasa aqshanyń úıge alyp ketýge týra keledi, bul óte qaýipti. Al biz aqshany bir túnge «elektrondy kassırge» tastap ketýdi usynamyz. Ol táýligine 100 mıllıon teńgege deıin qabyldaı alady, bul úshin az mólsherde tólem aqy alynady,-deıdi «Qazposhta» AQ basqarma tóraǵasy Sáken Sársenov.
Sandyq bólimshede bar-joǵy eki qyzmetker qyzmet kórsetedi, olar kelýshilerge tehnıkamen jumys jasaýdy úıretedi. Salystyrma úshin aıta keteıik, standartty poshtalyq bólimshede 20-dan astam adam qyzmet etedi.
Eskeretin jaıt, sandyq keńseni ashý úshin úlken kólemde qarjy qajet bolmady. Aktsıonerlik qoǵam basshylyǵy qymbat tehnıkany almaǵan, olardy seriktester usynǵan. «Qazposhta» tek qyzmet kórsetý úshin ǵana aqy tóleıdi.
Barlyǵy Qazaqstanda osyndaı 8 bólimshe ashý josparlanýda. Olardyń ekeýi Astana men Almatyda jumys isteıdi. Qaraǵandylyq keńse úshinshisi.
Kezdesý sońynda aımaq basshysy qaraǵandylyqtar kezekterde turmaı, qajetti qyzmetti jyldam alý úshin jańa bólimsheniń múmkindikteri men artyqshylyqtaryn keń kólemde nasıhattaýdy tapsyrdy.