Qaraǵandyda «QazAvtoJol» fılıaly basshysynyń orynbasaryna qatysty 6 shaǵym tústi
QARAǴANDY. QazAqparat - Qaraǵandyda 17 mıllıon teńge kóleminde para aldy degen kúdikpen qamaýǵa alynǵan «Qazavtojol» respýblıkalyq memlekettik kásipornynyń Qaraǵandy oblysyndaǵy fılıaly basshysynyń orynbasary Erjan Otarovqa qatysty túsken alty shaǵym sot tarapynan qanaǵattandyryldy, dep habarlaıdy "QazAqparat" HAA tilshisi.
Sybaılas jemqorlyqqa qarsy is-qımyl jónindegi ulttyq bıýro departamentiniń qyzmetkerleri Erjan Otarovtyń isimen aınalyspaı turyp, oǵan qatysty alty adamnan sotqa shaǵym tústi. Olardyń tórteýi jeke tulǵalar jáne eki zańdy tulǵa - oǵan qaryz bergen «Qazaqtelekom» kompanııasy jáne jeke fırma.
«Qazaqtelekom» statsıonarlyq úı telefony qyzmetiniń 13 myń 484 teńge kólemindegi aqysyn tóleýdi talap etti. Joǵary qyzmetti laýazymdy tulǵa belgisiz sebeptermen qyzmet aqysyn tólemegen. Sonymen qatar, Otarovqa tıisti qaryz kelisimsharttaryn rásimdeı otyryp, 1 mıllıon 400 myń teńge bergen jeke fırma tarapynan shaǵym kelip tústi. Kúdikti bul qaryzdy da ótemegen. Qalǵan tórt talap qoıýshylar da onyń qolhat berip alyp, qaıtarmaǵan qaryzdaryn óteýin talap etti. Qaryzdardyń jalpy somasy 31 mıllıon teńgeni qurady. Otarov sot shaqyrý qaǵazdary men sms-habarlamalaryn alǵanymen, birde-bir sot otyrysyna kelmegen.
Qaraǵandy turǵyny Otarovtan 23 mıllıon 299 myń teńge talap etti.
«Otarov jáne ekinshi jaýapkerden 23 mıllıon 299 myń teńge qaryzyn óndirý jóninde sheshim shyǵaryldy», - dep habarlady Qaraǵandynyń №2 Qazybek bı aýdandyq soty.
Talap etýshiler tiziminde Qaraǵandynyń beligili alvokaty da bar. Ol Otarovqa qaryzǵa 4 mıllıon teńge bergen. Taraptar qaryz kelisimshartyn jasasqan. Otarov 4 mıllıon teńgeni 1 shildege deıin qaıtarýǵa ýáde etken, alaıda, kelisimshart júzindegi mindetterin oryndamaǵan.
Úsh mıllıon teńge qaryzdy sot sheshimi boıynsha Otarov Qaraǵandy qalasynyń taǵy bir turǵynyna qaıtarýǵa mindetti. Budan ózge 1 mıllıon 95 myń teńge taǵy bir qaraǵandylyq azamatqa qaıtarylýy tıis.
Aıta keteıik, «Qazaqavtojol» respýblıkalyq memlekettik kásiporynynyń Qaraǵandy oblysyndaǵy fılıaly basshysynyń orynbasary Erjan Otarov almatylyq jol jóndeý fırmasynyń dırektorynan para aldy degen kúdikpen ustalǵan bolatyn. Laýazymdy tulǵa jol jóndeý fırmasynyń dırektory kabınetinen shyǵyp ketkennen soń 15 mınýttan keıin ustaldy. Sheneýnikti arnaıy jasaqtyń kómegimen sybaılas jemqorlyqqa qarsy is-qımyl ulttyq bıýro departamentiniń qyzmetkerleri ustady. Erjan Otarov tergeý bólimi basshysyna kinásin tolyqtaı moıyndady.
