Qaraǵandyda «Qazaqstannyń úzdik taýary» óńirlik baıqaýynyń jeńimpazdary anyqtaldy
Óńirlik baıqaý-kórmesi úsh nomınatsııa boıynsha ótti: «Óndiristik maqsattaǵy úzdik taýarlar», «Úzdik azyq-túlik taýarlary», «Halyqqa arnalǵan úzdik taýarlar». Jeńimpazdar Astanada ótetin respýblıkalyq baıqaýda oblys namysyn qorǵaýǵa barady.
Kórmege barlyǵy 80 oblys taýar óndirýshileri qatysty. Bul iri kompanııalar jáne «Bastaý bıznes» baǵdarlamasy boıynsha oqytylǵan bastaýshy kásipkerler.
Osy jyly kórmege alǵash qatysýshy jańa ónimder qatarynda – Qazaqstanda otqa tózimdi materıaldardy óndirý boıynsha «Seven refractories» JShS zaýytynyń ónimi. Bul zaýyt joǵary sapaly materıaldar – shoıyn, bolat, tsement, alıýmınıı, qyzdyrý peshterin, sondaı-aq «Qazaqmys», «ArselorMıtall Temirtaý», «Kaztsınk» sııaqty iri kompanııalar muqtaj taǵy basqalaryn shyǵaratyn elimizdegi birinshi kásiporyn bolyp tabylady. Eger olar aldynda otqa tózimdi materıaldardy shetelden satyp alsa, onda qazir olardy qaraǵandylyq óndirýshiden alatyn bolady.
Balqashtyń jeke kásipkeri Ábdikárimova kvas pen lımonad óndirisi boıynsha kásiporyndy kórme kelýshileriniń nazaryna usyndy. «Holdıng Altyn Arna» JShS 13 jyl boıy polıetılen jáne polımer ónimderiniń óndirisimen aınalysady. Olardyń suryptalymynda jylyjaı, qurylys aýyl sharýashylyq, oraýysh plenkalar men taǵy basqalary bar.
Qazaqstanda dámdeýish, tuzdyq, tez daıyndalatyn sorpa, tatymdylar men kýlınarlyq qosymshalar naryǵyna iri saýda-óndiristik kompanııalardyń biri «Malý» JShS óz ónimin usyndy. Sondaı-aq kórme qatysýshylary arasynda birneshe toqyma kásiporyndary da boldy. Kórme qonaqtary jergilikti tigilgen kıimderdi ǵana emes, sonymen birge alýan túrli úıge arnalǵan toqyma tekstılin tamashalaı aldy.
Sondaı-aq «Bıznes Bastaý» baǵdarlamasynyń túlekteri óz ónimderin kórsetti. Olardyń ishinde qymyz, jartylaı fabrıkattar, sút taýarlary, kondıter buıymdary, et ónimderi men taǵy basqalaryn óndirýshiler bar. Jergilikti qolóner sheberleri kóptegen táttilerdi – tort, nan-toqash, sút jáne daıyn et ónimderin usyndy.
Gúlbarshyn Meıirhan Buqar-Jyraý aýdanynan keldi.
- Men óz isimdi eki jyl buryn bastadym. Ulttyq stılde jastyq, kórpe dıvan jabynyn tigemin. Aldymen tanystarym men aýyl turǵyndarynan tapsyrys aldym. «Bastaý bıznes» baǵdarlamasy týraly bilip, oqýǵa bel býdym. Jýyrda kýrsty támámdap, sertıfıkat aldym. Búgin admdar kóbirek bilsin dep óz ónimderimdi kórmege ákeldim. Ózim ІІ top múgedegimin, kóp bala anamyn, alaıda munyń bárine qaramastan óz bıznesimdi odan ári damytý úshin de ýaqyt tabamyn, - dedi Gúlbarshyn Meıirhan.
«Bastaý Bıznes» baǵdarlamasynyń taǵy bir túlegi Haırat Amanbeov et ónimderiniń óndirisimen aınalysady.
- 2016 jyly qaladan aýylǵa kóship kelýdi sheshtik. Sóıtip Shahtınskten Osakarovkaǵa kóshtik. Munda et dúkeni bolmady, sondyqtan osy kásippen aınalysýǵa bel býdym. Tanystarymnan «Bastaý bıznes» baǵdarlamasy týraly estip, oqýǵa bardym. Kýrs aıaqtalǵannan keıin maǵan 3 mıllıon teńge mólsherinde nesıe berdi. Sóıtip dúken satyp alyp, óz isimdi bastadym. Ótken jyly taǵy bir mıkrokredıt alyp, qajetti jabdyq satyp alǵanmyn. Búginde isim alǵa basty, biz shujyq, qazy, qaqtalǵan ónimder shyǵaramyz. Eki fermamen yntymaqtastyq etemiz, ózimizdiń de malymyz bar. Bolashaqta bıznesti keńeıtýdi josparlap otyrmyz. Kásipkerler palatasy bizge úlken kómek kórsetti, - dedi «Gýlzan» JK dırektory Haırat Amanbekov.
Baıqaý-kórme qorytyndysy boıynsha oblys ákiminiń oblysta sapaǵa qol jetkizgeni úshin syılyq «Sary-Arka Copper Processing» JShS katodty mys óndirisi boıynsha zaýytqa berildi.
«Óndiristik maqsattaǵy úzdik taýarlar» nomınatsııasyna 21 kásiporyn qatysty. Jeńimpaz «Holdıng-Altyn arna» JShS boldy.
«Halyqqa arnalǵan úzdik taýarlar» nomınatsııasyna oblystyń 24 kásiporny qatysty. Olardyń ishinde jeńimpaz «SUNPAPER» JShS sharýashylyq-turmys jáne sanıtarııalyq-gıgıenalyq maqsattaǵy qaǵaz buıymdarynyń sarandyq óndirýshisi boldy.
«Úzdik azyq-túlik taýarlary» nomınatsııasyna 15 kompanııa qatysty. Jeńimpaz - «Malý» JShS.
Bul kásiporyndar «Qazaqstannyń úzdik taýary» respýblıkalyq baıqaýynda bizdiń óńirdiń namysyn qorǵaıtyn bolady.
Sonymen birge, bıznes qaýymdastyqtar, memlekettik organdar men qaýymdastyqtar jeke nomınatsııasyn da aldy.
«BUSINESS–Áleýmet» Úzdik áleýmettik-baǵdarly kásiporyn» nomınatsııasynda «ALEMGAZ» JShS marapattaldy. «Innovatsııalyq joba» - nomınatsııasynda – «PROTOM» JShS. Bıznes úshin úzdik BAQ «Jańa televıdenıe» telekompanııasy boldy. «ShOB damytýda jeke úlesi úshin» nomınatsııasynda Nadejda Peregon marapattaldy. «Úlgilik salyq tóleýshi» nomınatsııasynda «Saryarqa Nan Karagandy» JShS marapatyn aldy. «Qaraǵandynyń úzdik eksporttyq-baǵytty kásiporyndary» nomınatsııasyn «Bemmer Armatýra» JShS jeńiske jetti.
- Kásipkerler palatasy ınvestorlarmen jáne áriptestermen baılanysty retteýge kómektesip, olardyń quqyqtary men múddelerin qorǵap, otandyq óndirýshilerdi únemi qoldaıdy. Al «Qazaqstannyń úzdik taýary» - óńir turǵyndary óndirýshilermen jáne jergilikti ónimmen tanysatyn negizgi alań. Biz «Qaraǵandyda jasalǵan» markasymen taýarlardy keńinen jarnamalaý jáne jyljytý maqsatyn kózdeımiz. Jyldan jylǵa taýarlar men qyzmetterge tutynýshylardyń talaptary ósýde, básekelestik óndirýshilerdi asyqtyrady, jáne biz ónim sapasynyń artqanyn kórip otyrmyz. Buǵan qaraǵandylyqtardyń óziniń kózi jetken shyǵar, - dedi Qaraǵandy oblysynyń Kásipkerler palatasynyń dırektory Ernar Kýlpeısov.
Eske sala ketsek, «Qazaqstannyń úzdik taýary» baıqaý-kórmesi 2001 jyldan ótkizilip jatyr. 2015 jyldan bastap oǵan jeke kásipkerler de qatysady. Negizgi nomınatsııalardan basqa, qoǵamdyq uıymdardan, qaýymdastyqtar men óńirdiń bıznes-qaýymdastyqtarynan 7 qosymsha nomınatsııa quryldy.
