Qaraǵandyda qaýipsizdikti qamtamasyz etý boıynsha jańa joba engiziledi

QARAǴANDY. QazAqparat - Qazaqstan Respýblıkasy ishki ister mınıstriniń orynbasary Alekseı Kalaıchıdı jumys saparymen Qaraǵandy oblysyna keldi. Sapardyń maqsaty Qaraǵandyda elimiz boıynsha alǵashqy qoǵamdyq qaýipsizdikti qamtamasyz etýde servıstik tásildiń «pılottyq» jobasyn engizý bolyp tabylady, dep habarlaıdy QazAqparat tilshisi.

«Bul tásildiń jańalyǵy - jergilikti qoǵamdastyq pen barlyq bılik organdaryn quqyq buzýshylyqtyń aldyn alý máselelerine tartý», - dep habarlady mınıstrdiń orynbasary Alekseı Kalaıchıdı.

Atalmysh jobany iske qospas buryn ol Qaraǵandy óńirindegi tártip saqtaý baǵytyndaǵy jumystarmen tanysyp shyqty.

Birinshi kezekte polıtsııa departamentiniń front-keńsesine baryp, kelýshilermen áńgimelesti. Qaraǵandy oblysy PD bastyǵynyń birinshi orynbasary polıtsııa polkovnıgi Qurmanǵalı Ysmaǵulov qaladaǵy qoǵamdyq tártipti qamtamasyz etý boıynsha óńirlik polıtseıler qabyldaǵan sharalar týraly baıandady.

Sondaı-aq Kalaıchıdı jedel basqarý ortalyǵynn kórdi. Qazirgi tańda qala boıynsha 4820 beınebaqylaý kamerasy ornatylǵan.

Budan keıin mınıstrdiń orynbasary 130 balany aman alyp qalý jolynda óz ómirin qıǵan polıtsııa batyry Qaırat Jumabekovtiń otbasyna baryp, onyń týystarymen kezdesti.

«Biz eshqashan qyzmettik boryshyn atqarý kezinde qaza tapqan áriptesterimizdi umytpaımyz. Qazaqstan táýelsizdik alǵannan beri qyzmettik boryshyn oryndaý kezinde respýblıkada 700-den astam polıtseı, onyń ishinde Qaraǵandy oblysynda 31 qyzmetker qaza tapty. Qazaqstan Respýblıkasy Іshki ister mınıstrliginiń basshylyǵy qyzmettik boryshyn atqarý kezinde qaza tapqan qyzmetkerlerdiń otbasylaryna kóńil bóledi. Kómek pen qoldaý kórsetiledi», - dep atap ótti polıtsııa polkovnıgi A. Kalaıchıdı.