Qaraǵandyda qatty qaptamasy bar dáriler óndirisi iske qosyldy
ASTANA. QazAqparat - Qaraǵandyda «Fıtohımııa» halyqaralyq ǵylymı-óndiristik xoldıngi elimizde alǵashqylardyń biri bolyp qatty qabyǵy bar dáriler óndirisin iske qosty, dep habarlaıdy oblystyq ákimdiktiń baspasóz qyzmeti.
Innovatsııalyq joba «Ǵylym qory» AQ qarjylyq qoldaýynyń kómegimen júzege asyrylýda. Jabdyqtar Germanııadan satyp alyndy.
«Joba Elbasynyń Ult josparyndaǵy 64-shi qadamda belgilengen ǵylymı jumystardy kommertsııalandyrý sheńberinde oılastyrylǵan. 2016 jyly qaraǵandylyq ǵalymdar atalmysh jobamen baıqaýdy jeńip, nátıjesinde Ǵylym qory 100 mln teńge bóldi. Preparatty birden «Arglabın natıvnyı» jumys ataýymen tirkedi. Qazirgi tańda ol klınıkalyq synaqtan ótip jatyr. Degenmen qazirdiń ózinde atalmysh ımmýntúrlendirýshi shet eldik balamalarynan kem túspeıdi dep aıtýǵa bolady. Buǵan qosa onyń ózindik artyqshylyǵy bar - onyń quny ımporttyq dárilerden anaǵurlym arzanyraq», - dedi «Ǵylym qory» AQ basqarma tóraǵasy Ánýarbek Sultanǵazın.
«Fıtohımııa» HǴÓH bas dırektory Serǵazy Ádekenovtyń aıtýynsha, tanystyrýǵa kelgen ızraıldik farmatsevter men bıznesmender qaraǵandylyqtarmen seriktestik ornatýǵa qyzyǵýshylyq tanytýda. Keleshekte olar osynda dárilik sýbstantsııa alyp kelip, qatty qaptamamen qaptap, Qazaqstanda tirkeıdi jáne xalyqaralyq naryqqa jyljytady.
Qatty qaptamadaǵy dáriler ishýge yńǵaıly, sebebi dármektiń aşy dámi sezilmeıdi. Sonymen qatar baǵytty áser etýiniń arqasynda dáriniń tıimdiligi artady.
«Búgingi tańda Qaraǵandyda 17 kásiporyndy biriktiretin farmatsevtıkalyq klaster sátti jumys isteýde. Klasterdiń eń basty ólshemsharttarynyń biri ınnovatsııalyq texnologııalardy engizý bolyp tabylady», - dep atap ótti Serǵazy Ádekenov.
Ol jańa texnologııalar otandyq dárilerdiń qunyn tómendetýge múmkindik beretinin jetkizdi. Óndiristik shyǵyndar eki-úsh ese tómendeıdi. Holdıng taǵy osy sekildi bes mashına satyp alyp, óndiretin ónimder jelisin keńeıtýdi josparlap otyr.
«Ǵylym qory» AQ «Fıtohımııa» HǴÓH» AQ birlesip «Tupnusqaly ımmýntúrlendirýshi dármekti óndirýdi jáne jańa synaq preparattaryn shyǵarýdy uıymdastyrý» atty granttyq ınnovatsııalyq jobany júzege asyrýda.
