Qaraǵandyda qaterli isikke qarsy endoskopııalyq ádis qoldanyla bastaıdy
QARAǴANDY. QazAqparat - Qaraǵandyda 2020 jyly qaterli isikteri bar naýqastardy dıagnostıkalaýǵa arnalǵan Oblystyq endoskopııa ortalyǵy ashylady, dep habarlaıdy QazAqparat tilshisi.
Qaraǵandy oblystyq densaýlyq saqtaý basqarmasynyń basshysy Erjan Nurlybaevtyń aıtýynsha, Endoskopııa ortalyǵy álemdik deńgeıdegi óndirýshilerdiń eń zamanaýı medıtsınalyq jabdyqtarymen qamtylatyn bolady. Joba bıýdjettik qarajat esebinen Oblystyq onkologııalyq dıspanserde qurylady. Atalmysh jobanyń iske qosylýy qaterli isikterdi erte kezeńde anyqtap, naýqastardyń emdelýin jeńildetýge úlken septigin tıgizedi.
«Endoskopııalyq qurylǵylarmen emdeý - álemdik tájirıbe. Bul ádis kezinde úlken tilik jasaýdyń qajeti joq ári bul asa tıimdi», - dep atap ótti Qaraǵandy oblystyq densaýlyq saqtaý basqarmasynyń basshysy Erjan Nurlybaev.
Ol sonymen qatar onkologtarǵa qandaı zamanaýı qural-jabdyqtar beriletinin aıtty. Aldaǵy ýaqytta jelilik údetkishti satyp alý jáne ornatý josparlanyp otyr. Bul apparat bir mezgilde kompıýterlik tomograftyń kómegimen dıagnostıka júrgizýge jáne sáýleli terapııa arqyly em júrgizýge múmkindik beredi, dep túsindirdi basqarma basshysy.
Onkologııadaǵy eń jańa ádisterdiń birin memlekettik-jekeshelik áriptestik tetigin paıdalaný arqyly engizý josparlanyp otyr. Bul - pozıtrondy-emıssııalyq tomografııa (PET-KT). Atalmysh ádis radıoaktıvti zattyń kómegimen deneni nemese onyń bólikterin skanerleý bolyp tabylady.
«Bul ádis aýrýdy erte kezeńde jáne patologııa endi ǵana paıda bolǵaly turǵan kezinde kishkentaı isik oshaqtaryn anyqtaýǵa múmkindik beredi. MJÁ jobasy qolǵa alynyp, jeke ınvestormen kelisim jasaldy», - dedi Erjan Nurlybaev.
