Qaraǵandyda kásipkerler máselesin arnaıy komıssııa sheshedi
QARAǴANDY. QazAqparat - Qaraǵandy oblysynyń ákimdigi janynan kásipkerlik máseleleri jónindegi komıssııa quryldy, dep habarlaıdy «QazAqparat» HAA tilshisi.
Qaraǵandy oblysy ákimdiginiń baspasóz qyzmetiniń habarlaýynsha, kásipkerlik máseleleri jónindegi konsýltatsııalyq-keńesshi komıssııanyń birinshi otyrysy ótti. Keńes quramyna óńirlik kásipkerler palatasy men bıznes-qaýymdastyqtardyń ókilderi engen. Mundaı otyrysty aı saıyn ótkizip turý týraly sheshim qabyldandy, al onyń aralyǵynda jumys toptary áreket etetin bolady.
Otyrysqa deıin óńir basshysy Erlan Qoshanov jergilikti bıznes ókilderimen kezdesti. Kezdesýde kásipkerler ózekti máselelerin ortaǵa salyp, birqatar máselelerdiń túıinin sheshti. «Bul bizdiń birinshi otyrysymyz. Endi óńirdegi bıznes ahýaldy jaqsartyp, ınvestıtsııalyq tartymdylyǵyn arttyrý úshin birge jumys isteıtin bolamyz», - dedi óńir basshysy.
Oblys ákiminiń orynbasary Marǵulan Káribekov ózekti máseleler boıynsha atqarylǵan jumystardy baıandady. Ol Qaraǵandydaǵy zańdy tulǵalardyń tórtten biri úshin sýǵa tarıfterdi tómendetý týraly ýaǵdalastyqtarǵa qol jetkizgenin habarlady. Jylyna 5 myń tekshe metrge deıingi sýdyń tekshe metri 320,63 teńgeniń ornyna 248 teńgeni quraıdy.
Egin egý maýsymynda oblys sharýalaryna arzandatylǵan dızel otynyn jetkizý máselesi sheshildi. Marǵulan Káribekovtiń aıtýynsha, otandyq taýar óndirýshilerge qoldaý kórsetý máselesi de nazardan tys qalmaǵan. Oblystyń aýyl sharýashylyǵy taýarlaryn óndirýshilerine ınvestıtsııalyq sýbsıdııalardy tóleý bastaldy, mamyr aıynda barlyq qaryzdy óteý josparlanǵan. Shahtınskide Shahan, Dolınka jáne Aqtas kentterindegi jer ýchaskelerine negizgi stavkalardy azaıtý máselesi qaralýda.Odan bólek, kásipkerlerge Qaraǵandy jáne Temirtaý qalalary boıynsha esh áreketsiz, ekinshi deńgeıli bankterde kepilde turǵan nysandar kartasy kórsetildi.
Keńes otyrysy oblystyq memlekettik aktıvter men satyp alýlar basqarmasy men óńirlik kásipkerler palatasynyń memorandýmge qol qoıýymen aıaqtaldy. Otyrys qorytyndysy boıynsha oblys ákimi birqatar tapsyrmalar berdi. Onyń biri kásipkerlerdiń bos jer ýchaskeleri jóninde aqparatty ashyq túrde jarııalaý týraly ótinishimen baılanysty.
