Qaraǵandyda kásipker óz ǵımaratynyń bir bóligin AHAT bólimine tegin berdi

ASTANA. QazAqparat - Qaraǵandy oblysynyń ákimi etno-saıabaq aýmaǵynda ornalasqan «Aq saraı» jańa meıramhana kesheniniń ǵımaratyn kórip qaıtty. Bul nysan ıesi Bolat Qojaqpaev ǵımarattyń bir bóligin tegin berdi. Endi ol jerde Qazybek bı atyndaǵy aýdannyń AHAT bólimi ornalasatyn bolady, dep habarlaıdy ákimdiktiń baspasóz qyzmeti.

Kásipker etno-saıabaq aýmaǵynda meıramhana salyp jatyr. Nursultan Nazarbaevtyń «Bolashaqqa baǵdar: qoǵamdyq sanany rýhanı jańǵyrtý» baǵdarlamalyq maqalasynda aıtylǵan «Týǵan jer» baǵdarlamasyn júzege asyrý maqsatynda ol ǵımarattyń bir bóligin Qazybek bı atyndaǵy aýdannyń AHAT bólimine uzaqmerzimge tegin berýdi uıǵarǵan.

«Men ózim Qaraǵandy oblysynda óstim. Osy jerdiń jastary úshin úlken ómir jolyn bastaýda laıyqty ǵımarat bolǵanyn qalaımyn. Endi jas jubaılar ózderiniń nekesin ásem zalda qııa alady», - deıdi kásipker..

Alǵashqy jas jubaılardy AHAT bólimi osy jazda qabyldaımyz dep josparlap otyr. Mamandar kún saıyn Qaraǵandynyń ár aýdandarynan, tipti basqa qalalardan kelgen 50 juptyń nekesin qııatyn bolamyz deıdi.