Qaraǵandyda qarjy pıramıdasynyń alty sybaılasy jazadan bosatyldy

QARAǴANDY. QazAqparat - Astana, Qaraǵandy jáne Temirtaý qalalarynda 1,5 myń salymshynyń 3 mıllıard teńgesin alyp, olardy san qaqtyrǵan Optovka qarjy pıramıdasyn qurýǵa qatysy bar alty adamǵa qatysty qylmystyq qýdalaý toqtatyldy, dep habarlaıdy «QazAqparat» HAA tilshisi.

Pıramıdanyń negizin qalady dep kúdiktelip otyrǵan  Elena Kolesnıkova ǵana sot aldynda jaýap beretin bolady. Qaraǵandy oblystyq prokýratýrasy baspasóz qyzmetiniń habarlaýynsha, Kolesnıkovaǵa qatysty tergeý aıaqtalyp, is sotqa tapsyryldy.

«Áıelge QK-niń 217-baby 3-bólimi («Asa iri kólemde aqsha nemese ózge múlikti tarta otyryp, qarjy pıramıdasyn qurý jáne oǵan jetekshilik etý») boıynsha aıyp taǵyldy, - dep habarlady prokýratýranyń baspasóz qyzmetinen. - Іs sottyń qaraýyna jiberildi. Anyqtalǵandaı, fırma tarapynan jeke tulǵalardan 3 mıllıard teńgege jýyq aqsha jınalyp, onyń 2 mıllıardy salymshylarǵa qaıtarylmaǵan. Bir jarym myńǵa jýyq salymshy men kýágerlerden jaýap alynyp,  eki myńǵa jýyq tekserý áreketteri júrgizildi, olardyń qatarynda sot saraptamalary jáne basqa da tekserýler bar».

Áıeldiń aıtýynsha,  onyń alaıaqtyq jasaý nıeti bolmaǵan, azamattardyń aqshasyn qaıtaryp berýine jeke salymshylardyń  shaǵymdary  men  tekserý organdarynyń aralasýy kedergi bolǵan. Qarjy pıramıdasynyń boljaldy negizin qalaýshy Elena Kolesnıkova qamaýǵa alyndy.