Qaraǵandyda qarııalarǵa arnalǵan belsendi ómir ortalyǵy ashyldy
QARAǴANDY. QAZAQPARAT - Qaraǵandylyq zeınetkerler endi belsendi túrde sportpen shuǵyldanyp, til úırenip, basseınge bara alady. Bul úıirmelerdiń barlyǵy egde adamdarǵa tegin usynylady, dep habarlaıdy QazAqapart tilshisi.
Búgin Qaraǵandyda Qazaqstan halqy Assambleıasynyń Dostyq úıinde zeınet jastaǵy azamattarǵa arnalǵan «Belsendi ómir» ortalyǵy ashyldy. Joba aǵa býyndy qoldaý boıynsha Jol kartasy sheńberinde júzege asyryldy.
Jańa ortalyqta zeınetke shyqqan qarııalar úshin shahmat oınaýǵa arnalǵan ústelder, lıngafondy synyptary bar kabınetter men bı jáne sportpen shuǵyldanýǵa arnalǵan zaldar bar.
«Bizdiń ortalyq 60 adamǵa shaqtalǵan, qazirdiń ózinde 45 adam jazylyp qoıdy. Adamdar sany kóbeıgen saıyn olardy aýdandarǵa bólýdi josparlap otyrmyz, - deıdi ortalyq jetekshisi Raýshan Quzǵumbaeva. - Aptasyna bir ret barlyǵyna ortaq bir shara ótkizý josparlanyp otyr. Al qalǵan kúnderi kelýshiler ózderi tańdaǵan úıirmelerge baryp otyrady».
Ortalyq Qazaqstan halqy Assambleıasynyń qaraǵandylyq fılıaly jáne «Nur Otan» partııasynyń oblystyq fılıalynyń bastamasymen ashylǵan. Qajetti jabdyqtar metsenattardyń usynǵan qarajatyna satyp alyndy.
Ortalyqty ashýdyń basty maqsaty - egde jastaǵy turǵyndardy belsendi zııatkerlik, shyǵarmashylyq jáne qoǵamdyq ómirge baýlý. Ol úshin úıirmeler men sektsııalardy júrgizetin eriktiler jumyldyrylǵan. Ortalyqtyń ashylý saltanatyna QR Parlament Májilisiniń depýtattary, «Nur Otan» partııasynyń Fraktsııa músheleri Albert Raý jáne Gúlnár Bıjanova qatysty. 
«Mysal retinde japondyqtardy alatyn bolsaq, olardyń qarııalary belsendi ómirlerin zeınetke shyqqan soń bastaıdy. Olar tilderdi úırenip, sportpen shuǵyldanyp, jańa bir kásipterdi meńgere bastaıdy. Bizdiń de aǵa býyn zeınet jasyna kelgende ózin eshkimge kereksiz sezinbeı, eńsesin túsirmeı, belsendi ómir bastasa eken deımiz. Dál osy maqsatta osyndaı ortalyqtar qurylyp jatyr», - dedi QR Parlament Májilisiniń depýtaty Gúlnár Bıjanova.
«Nur Otan» partııasynyń oblystyq fılıaly tóraǵasynyń orynbasary Qadısha Ospanovanyń aıtýynsha, jazda ortalyq múshelerine oblystyń kıeli jerlerine saıahat uıymdastyrylady. Sonymen qatar keleshekte zeınetkerler úshin basseınge jáne jattyǵý zaldaryna abonement beriledi dep josparlanýda.
Egde jastaǵy adamdarǵa arnalǵan úıirmeler kestesi jaqyn arada paıda bolady. Ony zeınetkerlerdiń tilekterin eskere otyryp qurady. Shahmat oıynyna arnalǵan kabınet jumys kúnderi 10.00-den 18.00-ge deıin jumys isteıdi. Úıirmege jazylý úshin Qazaqstan halqy Assambleıasynyń Dostyq úıine, 108-shi kabınetke kelý kerek.
