Qaraǵandyda kardıoońaltý ortalyǵy ashyldy

QARAǴANDY. QazAqparat - Qaraǵandyda QR Densaýlyq saqtaý mınıstri Eljan Birtanov kardıoreabılıtatsııalyq ortalyqtyń ashylýyna qatysty. Áleýmettik joba memlekettik-jeke menshik áriptestik jelisi boıynsha iske asyryldy, dep habarlaıdy QazAqparat oblys ákiminiń resmı saıtyna silteme jasap.

Ortalyqta júrek-qantamyr júıesi aýrýlary bar naýqastar ambýlatorııalyq jáne statsıonarlyq ońaltýdan ótedi.
«Bizdiń ortalyq mindetti áleýmettik medıtsınalyq saqtandyrý aıasynda ashylady. Ótken jyldyń jáne 2019 jyldyń birinshi jartyjyldyǵynyń qorytyndysy boıynsha kardıoońaltýǵa jyldyq qajettilik 1284 adamdy, al úshinshi kezeń - 1512 adamdy quraıdy. Biz mıokard ınfarkty men kardıohırýrgııalyq ota jasatqan adamdarǵa kómek kórsetemiz. Bizge № 2 qalalyq aýrýhanadan patsıentter aýysatyn bolady, olar jeti kún em alady», - dedi «Tulpar» Kardıoońaltý ortalyǵy» JShS dırektory Baıan Ekijanova.
Ortalyq 70 tósek orynǵa shaqtalǵan jáne kardıoońaltý úshin barlyq qajetti jabdyqtarmen jabdyqtalǵan. Onyń shtatynda 55 adam qyzmet etedi, onyń 16-sy dárigerler.
«Biz emdelýshiler men medıtsınalyq qyzmetkerlerdiń nazaryn kelesi bir máselege aýdarǵymyz keledi: ońaltý – bul bizdiń kópten beri tıisinshe qarjylandyrylmaı kelgen salamyz. Bul adamdardy qalpyna keltiretin qyzmet túri ǵana emes, shyn máninde búkil densaýlyq saqtaý júıesiniń óte mańyzdy quramdasy. Kardıobaǵdarlamany iske asyrý aıasynda biz júrek-qantamyr júıesi aýrýlarynan bolatyn ólim-jitimdi tómendetýge qol jetkizdik. Meniń oıymsha, tolyqqandy ońaltý bul kórsetkishti jaqsartady. Medıtsınalyq saqtandyrý aıasynda osy kómekti engizý óte jaqsy nátıje beretindigine senimdimin», - dep atap ótti Densaýlyq saqtaý mınıstri.
2 qyrkúıekte Ortalyq alǵashqy patsıentterdi qabyldaıdy. Jylyna 1800-den astam adam ońaltý kómegin ala alady dep josparlanýda.