Qaraǵandyda karaoke-bar qonaqtary monıtorıng toby kelgende jertólege tyǵyldy

QARAǴANDY. QazAqparat – Qaraǵandy oblysynda monıtorıng toptary jumysyn jalǵastyrýda. Jyl basynan beri olar 10 978 nysandy tekserip, 429 kemshilik anyqtady, dep habarlaıdy QazAqparat tilshisi.

Máselen, ótken aptada Qaraǵandyda jumys rejımin buzǵan, sondaı-aq olardyń qyzmetine tyıym salynǵanyna qaramastan jumys isteıtin mekemeler anyqtaldy. Mysaly, 22.00-den keıin «To Mesto» restobarynda 13 kelýshi, «Mıata» laýndj-barynda 33 adam bolǵan. Sondaı-aq tyıymǵa qaramastan, Janymsoul karaoke-klýby (70 kelýshi), Tooman kalıany jáne «Djem» karaoke-bary jumys istedi.

Atap aıtqanda, «Djem» ıesi monıtorıng tobynyń jumysyna kedergi keltirdi: ol bardyń esikterin ishinen jaýyp, tekserýshilerdi kirgizbegen.

Monıtorıng toby ǵımarattaǵy esikterdi ashý úshin TJM shaqyrýǵa májbúr boldy.

Kelýshiler sol aralyqta jertóle men garajǵa tyǵylyp úlgergen, onyń ishinde úsh kámeletke tolmaǵan bala boldy.

«Djem» ıesine qatysty QR QK 667-baby boıynsha ákimshilik quqyq buzýshylyq týraly hattama jasaldy, karaoke-barda bolǵan 57 kelýshi de ákimshilik jaýapkershilikke tartyldy.

Sondaı-aq, barlyq oıyn-saýyq mekemelerine - tártip buzýshylarǵa jáne olardyń árbir kelýshisine 87 myń teńgeden aıyppul salyndy.

Esterińizge sala keteıik, Qaraǵandy oblysynyń bas memlekettik sanıtar dárigeriniń 19 qańtardaǵy qaýlysymen óńir turǵyndaryna ruqsat etilmegen qyzmet túrleri bar nysandarǵa barýǵa, sondaı-aq jumys rejımine baılanysty olar jabylǵannan keıin jumys istep turǵan nysandarǵa bolýǵa tyıym salynady.