Qaraǵandyda karantındik is-sharalarǵa qatysqan áskerı mindettiler marapattaldy
Olardyń arasynda resmı jumyssyzdar da, karantın kezinde demalysta júrgender de boldy. Áskerge shaqyrylýshylar bir aı boıy qala aýmaǵyn sanıtarlyq óńdeý úshin qosymsha kúsh retinde tartylǵan bolatyn.
Olardyń bári Qaraǵandy oblysynyń ákimi, qala basshysy, «Astana» óńirlik qolbasshylyǵy áskerleri qolbasshysynyń jáne jumyldyrý daıyndyǵy basqarmasynyń atynan alǵys hat aldy. Qaraǵandy oblysy ákiminiń orynbasary Ermaǵanbet Bólekpaev barlyq karantındik is-sharalarǵa qatysýshylarǵa jumysy úshin alǵysyn bildirip, densaýlyq tiledi.
Qaraǵandy oblysynyń jumyldyrý daıyndyǵy basqarmasynyń habarlaýynsha, barlyq áskerge shaqyrylýshylar turǵylyqty jeri boıynsha qyzmet etken, ıaǵnı basqa óńirlerge jiberilmegen. Keshke, eńbek kúninen keıin barlyǵyn úılerine baratyn bolǵan.
- Olardyń ortasha jasy - 25-35 jas. Arasynda ýaqytsha jumyssyz qalǵandar, ShOB salasynyń ókilderi boldy. Sondaı-aq, medıtsınalyq bilimi bar 17 adam shaqyrtylǵan. Arnaıy áskerge shaqyrylýshylarǵa áskerı qyzmetshiler úshin kózdelgen barlyq jeńildikter qarastyryldy. Jumyssyzdarǵa memleketten 42 500 teńgeden aqsha tólendi, al jumys istep júrgender burynǵydaı mólsherde jalaqylaryn aldy, - dedi Qaraǵandy oblysynyń jumyldyrý daıyndyǵy basqarmasynyń basshysy Jomart Jylqybaev.
Onyń aıtýynsha, áskerge shaqyrylýshylar Qaraǵandy men Temirtaý qalalarynda 9 mıllıon sharshy metr aýmaqty zalalsyzdandyrý quraldarymen óńdegen.
- Áskerı mindettilerdi úsh mezgil tamaqpen, kıim-keshekpen, jeke qorǵanys quraldarymen jáne arnaıy kostıýmdermen qamtamasyz etip, jumys kúni aıaqtalǵan soń úılerine tasymaldaǵan. Barlyq jumystar aıaqtalǵan soń PTR-test taldaýy júrgizildi, - dep atap ótti Jomart Jylqybaev.
Qaraǵandy oblysynda karantınniń jeńildetilýine qaramastan, qoǵamdyq oryndardy dezınfektsııalaý jalǵasady. Sondaı-aq jergilikti atqarýshy organdar kondomınıýmdarmen birge balalar men sporttyq aýlalyq alańdarda lıftilerdi, kireberisterdegi esik tutqalaryn jáne jabdyqtardy óńdeýge qamqorlyq jasaýy tıis.
