Qaraǵandyda qar tazalaıtyn kóliktiń júrgizýshisi er adamnyń máıitin taýyp aldy
QARAǴANDY. QazAqparat - Búgin tańerteń Qaraǵandy qalasynan «Saryarqa» áýejaıyna baratyn jolda 65-jasar er adam kóz jumdy, dep habarlaıdy QazAqparat tilshisi.
28 qańtarda tańerteń áýejaıdan Qaraǵandyǵa baratyn jolda 65 jastaǵy er adam kóz jumdy. Bul týraly polıtsııaǵa jáne jedel járdem qyzmetine qar tazalaıtyn kóliktiń júrgizýshisi habarlaǵan.
«Oqıǵa týraly habarlama bizge saǵat 10.45-te qar jınaıtyn tehnıka júrgizýshisinen kelip tústi. Jolda qar qursaýynda turyp qalǵan Hyundai avtokóliginiń 65 jasar júrgizýshisi temir tulparyn qardan alyp shyqqan soń, kóliginen shyǵyp, oqıǵa ornynda kóz jumǵan. Ol mashınadan shyqqan bette ózin nashar sezinip, sol jerde es-tússiz qulap túsken. Azamattyń óliminiń sebebin sarapshylar anyqtaıdy», - dep habarlady Qaraǵandy oblysy PD baspasóz qyzmeti.
