Qaraǵandyda qandastar arasynda basketboldan halyqaralyq týrnır ótti
NUR-SULTAN. QazAqparat – Qaraǵandy qalasynda Dúnıejúzi qazaqtarynyń qaýymdastyǵy jáne «Ata jurt» Respýblıkalyq qoǵamdyq qorynyń uıymdastyrýymen «Jastar jyly» aıasynda basketboldan erler arasynda «Dostyq» týrnıri ótti, dep habarlaıdy Dúnıejúzi qazaqtary qaýymdastyǵynyń baspasóz qyzmetine silteme jasap.
QR Tuńǵysh Prezıdenti kúni qarsańynda uıymdastyrylǵan halyqaralyq sporttyq is-sharaǵa barlyǵy 18 komanda qatysty. Onyń altaýy — ardagerler komandasy.
Jastarmen ardagerlerdiń oıyny eki bólek ótti. Ardagerlerdiń ishinde 1 orynǵa Nur-Sultan qalasynyń komandasy shyǵyp, 100 myń teńge jeńip aldy. 2 oryndy Qaraǵandy qalasynyń «Oqjetbes» komandasy ıelenip, 70 myń teńge utyp aldy. Almaty qalasynyń komandasy úshinshi oryn enshilep, 50 myń teńgemen marapattaldy.
Sonymen qatar, jastarymyzdyń arasynda ótken dúbirli dodada Shahtınsk qalasynyń «Dostar team» komandasy úzdik oıyn kórsetip, kýbok, altyn medalmen qosa 100 myń teńgeni qanjyǵasyna baılady. 2 orynda Pavlodar qalasynan kelgen «Dostar» komandasy, olar kishi kýbok jáne kúmis medal, sondaı-aq 70 myń teńgeni enshiledi. Nur-Sultan qalasynan kelgen «Nur Basket» komandasy úshinshi oryndy ıelenip, kishi kýbok, qola medal jáne 50 myń teńgeni enshiledi. Jáne de sporttyq sharaǵa qatysqan barlyq komandalarǵa aqshalaı qarjy men marapattar tabystaldy.
Qaraǵandy qalasynyń «Dostar team» komandasynyń oıynshysy Amanjol Tileýbekuly basketboldan ótkizilgen is shara buǵan deıin Almaty, Nur-Sultan qalalarynda ótkizilgenin jáne de bul jarys aldyńǵy ótken jarystardan qaraǵanda áldeqaıda aýqymy keńeıtilip joǵary deńgeıde ótkizilip jatqanyn aıta ketti.
Bul jarystyń ótýine Qaraǵandynyń barsha jany jomart, kóńili márt azamattary atsalysyp, qarjylaı kómek kórsetti.
Týrnırdiń aıasynda qandastarymyzdyń atamekenge kelip oqýyna úlken úles qosqan, halqyna eńbegi sińgen, jaqynda ómirden ótken Erkin Aqtyshqan atyndaǵy marapat jáne aqshalaı syılyq stýdentter arasynda joǵary deńgeıde oıyn kórsetkeni úshin Qaraǵandy memlekettik ýnıversıtetiniń stýdenti Ardabek Merekebekulyna tabystaldy.
