Qaraǵandyda qalalyq avtobýs júrgizýshisi esinen tanǵan áıeldi qutqaryp qaldy

QARAǴANDY. QazAqparat - Qaraǵandydaǵy marshrýttyq avtobýstyń júrgizýshisi jolaýshyny aýrýhanaǵa jetkizý úshin joldan shyǵyp ketti. Áıel kenetten esinen tanǵan, dep habarlaıdy QazAqparat tilshisi.

Oqıǵa №53 marshrýttyq avtobýsta boldy. Áıel kenetten esinen tanyp qaldy. Jolaýshylar esin jıǵyzyp, kómek kórsete bastaǵan. Sol ýaqytta avtobýs júrgizýshisi Almas Muratbek marshrýttan aýytqyp, esinen tanyp qalǵan áıeldi Maıqudyqtaǵy aýrýhanaǵa alyp barǵan.

Júrgizýshiniń aıtýynsha, jolaýshylar arasynda avtobýstyń burylyp ketkenine narazylyq tanytqandar da bolǵan.

«Jolaýshylardyń biri bir áıeldiń aýyryp qalǵanyn aıtqan kezde, men kabınany jeldetý úshin avtobýstyń aldyńǵy esigin ashtym. Sodan keıin men oılanbastan aýrýhanaǵa tarttym. Osy kezde keıbir jolaýshylar biz baǵyttan aýytqyp kettik dep ashýlana bastady. Biraq men «Qazir eń bastysy adam ómiri, sondyqtan men úshin qazir sol ǵana mańyzdy, uryspańyzdar!» dedim. Osydan keıin barlyǵy tynyshtaldy», - deıdi Almas Muratbek.

Áıel aýrýhanaǵa jetkizilgennen keıin ony dárigerler avtobýstan shyǵaryp, alǵashqy medıtsınalyq kómek kórsetti.

«Naýqasty dárigerler qarady, aýrýhanaǵa jatqyzýǵa aıtarlyqtaı negiz bolǵan joq. Keıin ol ambýlatorııalyq emdelýge jiberildi», - dep túsindirdi Qaraǵandy oblysynyń Densaýlyq saqtaý basqarmasy.

Naýqasty aýrýhanaǵa jetkizgen soń, qalǵan jolaýshylardy avtobýs júrgizýshisi qajetti aıaldamalarǵa jetkizdi.

«Men bárin mejelegen oryndaryna apardym. Al keshke aýrýhanaǵa qońyraý shalyp, aýyryp qalǵan jolaýshy áıeldiń jaǵdaıy týraly surap qońyraý shaldym. Olar naýqastyń jaǵdaıy jaqsy ekenin aıtqan kezde qýandym», - deıdi Almas Muratbek.

Avtobýstyń marshrýttan aýytqyp ketkeni týraly avtopark basshylyǵy keıinirek bilgen. Alaıda júrgizýshiniń aıtýynsha, basshylar buǵan túsinistikpen qaraǵan.