Qaraǵandyda qabynýǵa jáne gemofılııaǵa qarsy bıotehnologııalyq dáriler óndirisi iske qosyldy
ASTANA. QazAqparat - Qaraǵandyda farmatsevtıka salasy qarqyndy damyp keledi. «Qaraǵandy farmatsevtıkalyq kesheni» JShS zaýytynda eki bıotehnologııalyq preparattar - Rıtýksımab jáne Semıklotın shyǵaryla bastaıdy. Onyń birinshisi qabynýǵa qarsy dári, ekinshisi gemofılııamen aýyratyndardy emdeýge arnalǵan, dep habarlaıdy oblystyq ákimdiktiń baspasóz qyzmeti.
Jýrnalıster úshin farmatsevtıkalyq zaýytty aralaý múmkindigi týdy. BAQ ókilderi dárilerdiń qandaı taza jaǵdaıda shyǵarylatynyn óz kózderimen kórip qaıtty. Kásiporyn tsehtary álemdik markalardyń zamanaýı jabdyqtarymen jabdyqtalǵan.
«Bul dáriler otandyq farmındýstrııadaǵy ınnovatsııa bolyp tabylady. Basty maqsat - Qazaqstannyń farmatsevtıkalyq naryǵynda ımportty azaıtý, el halqyn mańyzy asa zor qajetti dári-dármektermen qamtý», - deıdi «Qazaqstannyń FarmMedIndýstrııasy» Assotsıatsııasynyń prezıdenti Rýslan Sultanov.
Atalmysh dárilerdi shyǵarýdy bastamas buryn olar uzaq klınıkalyq jáne klınıka aldyńǵy kezeńderden ótken.
«Bul óte qıyn protsess. Biz óz tıimdiligin dáleldeıtin tehnologııalar transferin jasaımyz. Bizdiń qurylymdyq seriktesimiz - «Farmstandart» kompanııasy, ol Reseı farmatsevtıka naryǵyndaǵy kóshbasshy, - deıdi «Qaraǵandy farmatsevtıkalyq kesheni» JShS atqarýshy dırektory Erikbek Aǵatanov. - Jańa preparattardyń tájirıbelik serııasyn biz 2015 jyldyń jeltoqsanynda shyǵardyq. Keıin preparattyń turaqtylyq deńgeıi ishteı jáne syrttaı zertteldi».
Kásiporyn tizbektemesinde 66 dárilik preparattar bar, olar áleýmettik mańyzdy aýrýlardy: onkologııa, gemofılııa, vırýsty gepatıt, qant dıabeti jáne basqa da aýrýlardy emdeýge baǵyttalǵan. Búginde onyń ekeýi ıgerildi, bolashaqta jyl saıyn tehnologııa transferin nyǵaıtý kózdelgen. Qaraǵandylyqtar respýblıkamyzda alǵashqy bolyp dárilerdi tazartylǵan qutylarda jáne kartrıdjdermen, sondaı-aq aldyn ala toltyrylǵan shprıtstarda shyǵara bastady.
Keshen qurylysy men jabdyqtalýyna 50 mln AQSh dollary kóleminde ınvestıtsııa salynǵan. Zaýyttyń óndiristik qýaty jylyna 4 mln qaptama. Jetekshiniń sózinshe, kásiporyn bul kórsetkishke úsh jylda shyǵýdy kózdep otyr.
Qaraǵandy farmatsevtıkalyq kesheniniń ónimderi elimizdegi emhanalarda taratylady. «SK-Farmatsııa» kompanııasymen kelisim jasalǵan, alǵashqy jetkizýler 2018 jyldyń qańtar aıyna josparlanǵan.
Ótken press-týr barysynda kásiporynǵa QR densaýlyq saqtaý mınıstrliginiń farmatsııa Komıteti bergen GMP (Tıisti óndiristik tájirıbe) sertıfıkaty tabystaldy.
