Qaraǵandyda IT-week.kz halyqaralyq forýmy qorytyndylandy
QARAǴANDY. QazAqparat - «IT-week.kz» forýmynda qoǵamdyq kólikte jol júrý aqysyn tóleý úshin qurylǵan mobıldi qosymsha úzdik dep tanyldy.
Qatysýshylar eki kún ishinde qala turǵyndarynyń ómiri men memlekettik organdardyń jumysyn jaqsartýǵa múmkindik beretin mobıldik qosymshalar men baǵdarlamalar ázirledi. Búgin qazylar alqasy jeńimpazdardyń esimderin atady, dep habarlaıdy QazAqparat tilshisi.
Forým 24 qyrkúıekte bastaldy. Baǵdarlamaǵa otandyq jáne sheteldik IT-kompanııalar ókilderiniń sheberlik sabaqtary, bos oryndar jármeńkesi jáne sandyq tehnologııalar kórmesi kirdi. Sharanyń basty oqıǵasy 48 saǵatqa sozylǵan hakaton boldy. Oǵan stýdentter men jas mamandardan quralǵan 30 komanda qatysty.
«Hakaton úsh kezeńge bólindi. Birinshisi – bilim berý. Biz ony «Startap mektebi» dep atadyq. Munda qatysýshylar óz ıdeıalaryn ortaǵa salyp, olardy modeldeýmen aınalysty. Ekinshi kezeń – mentorlyq. Bizde barlyǵy 11 mentor boldy. Olardyń barlyǵy qatysýshylarǵa kómek kórsetken kásipkerler. Qorytyndy kezeń – bul tikeleı damý. Barlyq kezeńderdiń qorytyndysy boıynsha jartylaı fınalǵa segiz komanda ótti. Olardyń ishinen biz úsh úzdikti tańdadyq», - dedi «Most» bıznes-ınkýbatorynyń dırektory jáne forýmdy uıymdastyrýshylardyń biri Álim Hamıtov.
500 myń teńge kólemindegi bas júlde RoadGuard baǵdarlamasynyń prototıpin jasaýshylarǵa buıyrdy. Baǵdarlamalyq qamtamasyz etý taksı jáne qoǵamdyq kólik qyzmetterin QR-kodtyń kómegimen uıaly telefon arqyly tóleýge múmkindik beredi. Baǵdarlamada keri baılanys bar. Jas baǵdarlamashylar 48 saǵat ishinde osy avtomattandyrylǵan júıeniń mobıldi qosymshasy men veb-nusqasyn jasap úlgerdi.
Ekinshi orynda Clean City qosymshasy boldy. Ol paıdalanýshylarǵa qalany tazalaýǵa jaýap beretin vedomstvoǵa ruqsat etilmegen qoqys tastaıtyn jerlerdiń fotosýretteri men geolokatsııasyn jiberýge múmkindik beredi. Bul baǵdarlama synaqtan ótip, jumysqa tolyq daıyn. Ony jasaýshylar ekinshi oryn alyp, 300 myń teńgeniń júldesin aldy.
Jeńimpazdardyń úshtigin Garbage Collector jobasy túıindedi, ol aldyńǵy jobalar sekildi qaladaǵy ruqsat etilmegen qoqys tastaıtyn jerlerdi anyqtaý maqsatynda ázirlengen. Ázirge bul tolyq qosymshanyń prototıpi ǵana, biraq qazylar alqasyna top músheleriniń alǵa qoıylǵan tapsyrmany oryndaý ıdeıasy men muqııat oryndaýy unady. Avtorlarǵa 200 myń teńge syılyq berildi.
Hakaton barysynda qatysýshylardyń jumystaryn iri IT-kompanııalardyń ókilderi baqylady.
«Qazir Qaraǵandyda úlken keńsesi bar amerıkalyq EPAM Systems kompanııasy bizdiń qatysýshylarymyzǵa qyzyǵýshylyq tanytty», - dedi Álim Hamıtov.
Forýmnyń sońǵy kúni plenarlyq sessııalar ótti. Onda Wooppay kompanııasynyń negizin qalaýshy Aleksandr Doroshenko, kompanııanyń aǵa menedjeri, EPAM Systems jobalaý keńsesiniń basshysy Vıacheslav Vasılenko, Qaraǵandy oblysynyń aqparattandyrý, memlekettik qyzmet kórsetý jáne muraǵattar basqarmasynyń basshysy Rýstam Baıjanov jáne basqalar sóz sóıledi.
