Qaraǵandyda ishimdik ishpegen júrgizýshilerdi dıspanserden ótýge májbúrlegen
Úılestirý keńesiniń otyrysynda ishimdik ishpegen júrgizýshilerdi negizsiz narkologııalyq dıspanserden ótýge májbúrleý statıstıkasy qaraldy. Statıstıkalyq málimetter boıynsha, 2016 jyl jáne 2017 jyldyń alǵashqy jartysynda 8 myń 292 júrgizýshi medıtsınalyq tekserýden ótýge mindettelgen bolsa, sonyń 4 myń 401-inen spırtti ishimdikter nemese esirtki qoldaný belgileri tabylmaǵan.
Úılestirý keńesiniń tóraǵasy, oblys prokýrory Marat Seksembaev adamdardyń konstıtýtsııalyq quqyǵy buzylmaýyn talap etti.
«Іshki ister organdary júrgizýshilerdi eshqandaı qujat rásimdemesten tekserýge jibergeni anyqtaldy», - dedi Marat Seksembaev.
Keńes músheleri «Ákimshilik quqyq buzýshylyq týraly» kodekske kólik quralyn toqtatqanda júrgizýshini tıisti qujat toltyryp jáne medıtsınalyq tekserýge jiberý múmkindigin beretindeı ózgeris engizý boıynsha usynystar ázirleıtin jumys tobyn qurý bastamasyn kóterdi.
Sondaı-aq Almatydaǵy sekildi alkotesterler satyp alý máselesin qaraý usynyldy. Deni saý júrgizýshilerdi medıtsınalyq tekserý úshin bıýdjetten tórt mıllıonnan astam qarjy jumsalǵan.
