Qaraǵandyda iri kóterme-saýda ortalyǵyn ashý kózdelýde
«Global City» kóterme-saýda ortalyǵy – azyq-túlikti saqtap, sortqa bólip, satýǵa arnalǵan iri hab jobasy. Ortalyqta ónimdi jappaı jáne bólshektep satýǵa múmkindik bar. Deldalsyz aýyl sharýashylyǵy ónimderin ótkizý – Qaraǵandy naryǵynda ǵana emes, respýblıkanyń ózge de aımaǵyndaǵy jemis-jıdek pen kókónistiń baǵasyn tómendetýge jol ashady.
Ortalyqta iri kólemde saýda júrgizetinder úshin ártúrli temperatýralyq rejımi bar klımattyq qoıma, qurǵaq qoıma, ýaqytsha saqtaý qoımalary, temirjol tyǵyryqtary, krany bar konteınerlik aýmaqtar, kedendik resimdeý oryndary men tıeý-túsirý tehnıkalary qarastyrylǵan.
Shaǵyn saýda úshin keshen eki kross-dokty, al jappaı satyp alýshylar úshin 164 tıeý avtokóligin usynady. Bólshektik saýdaǵa arnalyp, munda aýmaǵy 42 myń sharshy metrlik kóterme-saýda ortalyǵy turǵyzylǵan. Onyń ishinde jeke turatyn 149 saýda pavılony men 2 myń sharshy metrlik arnaıy et pavılony bar.
Kompanııanyń kommertsııalyq departamentiniń dırektory Naıl Munasıpov aıtyp ótkendeı, keshendi turǵyzýdaǵy maqsat – kásipkerler men aýyl sharýashylyǵy taýaryn ónidirýshiler bıznesin tabysty túrde júrgizý úshin jaıly jaǵdaı jasaý, saýda operatsııasynan deldaldardy ysyrý, azamattardy daıyn ári jańa ónimdermen qamtamasyz etý bolyp otyr. Deldaldardyń jolyn kesý arqyly tutynýshyǵa jetetin túpki baǵa tómendeıdi. Keshen aýmaǵy 60 ga aýmaqty alyp jatyr. Aldaǵy ýaqytta ony 100 ga-ǵa deıin keńeıtý kózdelgen.
Halyqqa yńǵaıly bolý úshin 2020 jyldyń sońynda kóterme-saýda ortalyǵynda avtostantsııa salynady.
Aıta ketsek, kóterme-saýda ortalyǵyn turǵyzý jumysy «Bıznestiń jol kartasy» jáne «Qarapaıym zattar ekonomıkasy» memlekettik baǵdarlamalary aıasynda qoldaýǵa ıe bolyp otyr.
Agata Muhamedjanova
