Qaraǵandyda IQala qalalyq qyzmet kórsetý ortalyǵy ashylady
Onyń mindeti qyzmet kórsetý protsesin avtomattandyrý, qaǵazbastylyqty, qyzmet kórsetýshilermen baılanysty jáne sybaılas jemqorlyq táýekelderin boldyrmaý bolyp tabylady, dep habarlaıdy QazAqparat tilshisi.
Bul týraly Óńirlik kommýnıkatsııalar qyzmeti platformasynda ótken brıfıngte Qaraǵandy oblysynyń aqparattandyrý, memlekettik qyzmetter kórsetý jáne arhıvter basqarmasy basshysynyń orynbasary Konstantın Ilnıtskıı málim etti.
Ortalyqty qurýdyń basty maqsaty – qyzmetterdi alý rásimderin jeńildetý. Turǵyndar onlaın-formatta IQala-ǵa habarlasyp, memlekettik organdar men kommýnaldyq qyzmetterge barmasa da bolady.
«Qazirgi ýaqytta kommýnaldyq qyzmetterdi usyný, tehnıkalyq sharttardy berý jáne t. b. úshin monopolıstermen kelisim-sharttar jasasý protsesi tikeleı qatysýdy talap etedi jáne birneshe kúnnen birneshe aıǵa deıin sozylady. Qaraǵandyda monopolısterdiń keńseleri qalanyń ártúrli bólikterinde ornalasqan, bul da qyzmetterdi alý protsesin qıyndatady, óıtkeni ádette ártúrli ǵımarattar arasynda birneshe ret qatynaýǵa týra keledi», – deıdi Konstantın Ilnıtskıı.
Biryńǵaı ortalyq qurý qyzmet kórsetýshilerge front-keńselerdi ustaýǵa jumsalatyn shyǵyndardy qysqartýǵa kómektesedi. IQala aptasyna jeti kún táýlik boıy jumys isteıdi. Turǵyndar ótinimderdi ózderine yńǵaıly ýaqytta bere alady.
